林保怡彈完又讚：廖碧兒好好人

林保怡、周家怡、廖碧兒、湯怡、王宗堯、趙學而及游學修等藝人主演、改編自作家南方舞廳小說《瑪嘉烈與大衛系列的綠豆》的ViuTV劇集《瑪嘉烈與大衛系列—綠豆》獲得好口碑，不少網民熱烈討論。不過，傳廖碧兒首日開工即耍大牌，誓要南方舞廳在場才肯開工，更不停出招「氹掂」對方改劇本，由配角變成女主角，令原本的女主角周家怡遭刪減戲份，加上有指廖碧兒因多次讀錯對白NG收場，因而「犯眾憎」。

網民讚有女人味
游學修日前在Facebook上載一段近15分鐘的飯局片，出席人士包括保怡、周家怡、湯怡及一眾工作人員，游學修於片中代網民問問題，當讀出網民大讚碧兒在劇中好好戲及有女人味時，周家怡及湯怡等齊齊報以掌聲，此時保怡指住拍掌者說：「你睇你哋幾假，講啲真嘢得唔得呀！」似暗寸碧兒「戲屎」！其後有網民問拍一輯要多久？保怡抵死地說：「咁就睇演員，有啲場口一Take，有啲二、三十Take。（邊個？）唔講啦。」身旁的監製插嘴說：「一Take嘅人喺晒度。」游學修又問邊播邊拍最大挑戰是甚麼？保怡回答時亦有骨落地：「嗰啲Take好多Take嗰啲囉！嘥時間！」有人笑他「爆料」，保怡正經說：「我講事實。」矛頭疑似直指碧兒，最後保怡更表示今次拍攝酬勞高過無綫。

疑劇集宣傳技巧

不過，保怡昨日透過電話回應時卻轉晒口風，多次幫碧兒講好說話：「碧兒記中文對白係辛苦，如果對白係英文就一流，對佢係有難度，導演喺鏡頭上幫咗碧兒好多。（話全劇演員唔鍾意佢？）唔係，碧兒好好人，成日帶紅酒請我哋飲。」對於短片中指有人要二、三十Take，保怡說：「誇張咗，最多三、四Take。」隨即抵死說：「你哋睇完段片真係覺得我哋話嗰個係廖碧兒？我哋達到目的。」似指短片為劇集宣傳技巧。至於談到人工多過無綫？保怡說：「接戲唔係睇錢，無綫有好戲都會接。」而游學修被問到在片中將廖碧兒擺上枱，他說：「睇到咩就咩，我補充唔到。」本報就此事聯絡廖碧兒，但她忙於工作，至截稿前未能回覆。

文：音樂組