港媽：贏在射精前惹爭議 千嬅：最緊要BB健康 思琦：節目啱家長睇

無綫前晚開始播放一連五集的真人騷節目《沒有起跑線？》，節目探討現時家長如何催谷小朋友，令下一代進入所謂的「人生勝利組」，而節目中的母親Irene沒有催谷過大仔，直至兒子參加幼兒班面試時，方驚覺兒子已輸在「起跑線」，故懷有第二胎時揚言要「贏在子宮裏」，並帶出有媽媽指要生一月份出世的BB，做「大仔」搶閘入好學校而要「贏在射精前」！節目播出後觀眾反應兩極，引起極大爭議。

育有一子的楊千嬅昨晚出席活動時，對於「贏在射精前」言論，她說：「咁得人驚？概念好唔啱，我覺得有啲家長要擇日開刀，為咗想小朋友同自己生肖一樣已經好誇張，我個仔六月出世，好明顯我係唔理呢啲，最緊要佢健康開心。」問她幾時開始再造人？她表示完成今年工作才打算。同場的前藝人楊張新悅亦指言論好恐怖：「好荒謬，有小朋友係禮物，唔通要份禮物仲要理點包裝？我有個女一月出世，有個九月出世，我唔覺得九月出世會特別吃力，最緊要健康。」

前晚節目《沒有起跑線？》主角Irene發表「贏在子宮裏」及「贏在射精前」言論，惹來網民兩極反應。	楊千嬅的囝囝在六月份出世，她從沒在意擇日生B。	楊思琦有興趣繼續收睇《沒有起跑線？》，藉此了解其他家長想法。

唔會計幾時出世

楊思琦的女兒正讀K1，她說：「緊張都會緊張，但真係冇諗過『贏在子宮裏』呢啲嘢，好誇張，要計到個BB幾時出世，唔會咁做，以前搵學校自己都有準備，但就冇節目中啲家長咁緊張，我有興趣繼續收看節目，都幾啱家長睇，睇吓大家諗法、內心世界係點。」而育有一女的郭羨妮聽完都覺得好大壓力，並說：「順其自然啦！我不嬲唔想咁大壓力話要去鬥、揀學校，最緊要小朋友開心、快樂，所以自己唔會逼個女，讀邊間學校都好，最緊要努力讀書。」

已為三女之母的楊張新悅直指小朋友是天賜禮物。	郭羨妮從來沒逼女兒讀書。	懷胎六個月的張嘉兒只希望小朋友多接觸運動。

與Irene同樣懷孕的張嘉兒前晚亦有收看，她直認香港的小朋友競爭大，不過建立小朋友的自信、品德及溝通技巧比學習不同技能及興趣更重要，懷胎六個月的她亦未想過要小朋友學甚麼，只想讓小朋友多接觸運動。

怪獸家長確存在

至於主角Irene昨日亦有在社交網留言，表示多謝大家關心，但節目出街後感到很大壓力：「有人焦點落喺『怪獸家長』係好事，因為大家討論怪獸家長存在問題，係節目希望帶出嘅事，而有人焦點落咗喺我呢個媽媽度，成件事錯晒……仲要人身攻擊。」Irene事後接受訪問時稱：「自己做父母仲有進步空間，睇咗網上留言，我都有反思，不過我想講我好錫我個仔，我亦都唔係怪獸家長。」

節目監製張志明指節目反映實況、以真人騷形式拍攝，並沒有誇張，時下的確有此情況。而編導岑應則有點擔心Irene，她稱：「因為佢大緊肚，唔希望刺激到佢，希望網民放過佢啦！」無綫公布該節目最高收視有17.7點（約115萬觀眾收看）。而通訊事務管理局截至昨日接到三個投訴，主要投訴內容用字粗鄙、內容偏頗及嘩眾取寵。

文：影視組