40歲陳嘉容 心郁想選美
名模陳嘉容（Eunis）及形象指導兼歌手馬天佑，昨日為時裝形象設計展擔任評判。Eunis表示近日忙於拍攝工作，每日早上五點起身，拍到晚上七、八點收工，半年內都不能輕鬆去旅行。現年40歲的她更直言想參與ViuTV選美真人騷節目：「我直情想參加，佢哋話唔得，因為我拍緊佢哋嘅節目，如果可以我都想試吓。我都over咗選美年齡，但唔介意玩吓，幾得意。」問到有否信心打低後生女？她表示：「各有特色。（有咩特色？）你哋講，我怕醜唔講喇。」
而本月17日28歲生日的馬天佑，收到好友何超蓮親手整的金咪蛋糕，他表示第一次收到好友親手造的蛋糕，又有20人陪他慶生，令他驚喜開心。問到如何向超蓮回禮？他笑言：「要浮誇啲。（介紹男友畀佢？）有諗過，但身邊冇人選，我介紹過幾個畀佢都唔啱。（佢有對象？）冇。」
