岑日珈揸「煮」意 逼阿爸收檔
今日父親節，岑日珈拉埋爸爸拍攝韓劇《太陽的後裔》溫馨版，宣揚孝順訊息！她透露已叫開生果舖的爸爸今日停工休息，一齊行街煮飯仔過溫馨父親節。她又希望賺多些錢，讓爸爸能在明年退休！
藝人岑日珈（Angie）跟爸爸一向感情深厚，趁着父親節前一同受訪晒溫馨，更二次創作《太陽的後裔》中綁鞋帶經典一幕，由Angie幫爸爸綁鞋帶顯孝心。等埋位時，Angie對爸爸噓寒問暖，難怪他望着女兒的眼神總會特別溫柔！
Angie慨嘆工作忙碌，少了時間跟家人相處，故會分外珍惜：「爸爸喺生果舖由朝做到晚，大家可以相處嘅時間就係得嗰兩個鐘。」笑言最希望爸爸在今日父親節可以好好休息：「過往父親節佢都係開舖，今年我就逼佢停工一日，一齊行街同買餸煮飯，我仲會親自下廚！」還透露已買皮帶作父親節禮物。
賺多啲 鋪退休路
問到會否想加快賺錢讓爸爸退休？Angie說：「爸爸心律不正，每個月都要覆診，有時佢搬搬吓橙就會扯晒氣，對於一個年紀大嘅人嚟講係比較危險，唔知邊次係會……大吉利是。」她又感觸地指希望爸爸可在明年退休：「爸爸出年就『7字頭』，覺得爸爸真係老咗，寧願我辛苦都唔想見到爸爸辛苦。」還坦言曾想快些找個男友見爸爸：「後嚟諗呢樣嘢唔可以急，好在爸爸都冇催我！」
文：音樂組
攝：張福宏