黃光亮「父」能量爆發收香香做「契女」
藝人黃光亮明白兒女債之苦，故與太太有共識不生兒育女。不過他與岑麗香拍劇譜出「父女情」。今個父親節，於劇中與香香上契的他，獲「契女」越洋送暖而喜上眉梢。
父親節是父親被讚揚的日子，演慣惡人的黃光亮雖然一副惡相，但其實內心和善。他在播畢劇集《火線下的江湖大佬》的結局中收了香香做契女，原來現實中二人亦私交甚篤，因香香很感激這位前輩悉心教導，加上又啱傾，故二人曾考慮上契。但黃光亮認為上契責任大，與香香商量後，大家都不想兒戲了事，最後將上契之事留在心中。
「感情放喺心」
黃光亮接受訪問時稱：「我同香香都係玩認真，唔想求其，亦唔需要名分，感情放喺心裏面就得。（你好多契仔契女？）我都有兩個，一個美國一個加拿大，佢哋會有表示嘅，冇嘅話實畀我鬧。」
身在加拿大的香香越洋大讚黃光亮對她悉心照顧：「其實我一開始唔認識亮哥哥，但兩人嘅友誼係角色帶嚟。亮哥哥好撐我，當我遇到NG時，佢會叫我慢慢放鬆，搵解決方法，我覺得有亮哥哥喺身邊好開心。（上契？）播到結局時有人問我哋係咪真上契，佢（黃光亮）諗過嚟真嘅話會有壓力，故覺得keep住友誼就OK。」
文：影視組