裕美老公叫黃子恆鍾意裕美就出嚟認

早前裕美與黃子恆因密會而爆緋聞，裕美隨即自揭與結婚兩年的Jason正辦理離婚手續，其後爆出裕美疑遭家暴，再有疑似裕美與黃子恆的情慾短訊外流，裕美與Jason的風波可謂日日新鮮，昨日事件再有新進展。昨日凌晨時分，Jason在社交網站Facebook上載一段自拍短片，片長約一分鐘，身穿白恤衫的Jason以白牆為背景，與當日裕美的自拍片段相似，木無表情的他在片中稱希望朋友不要再放料，放過裕美，言詞間極力維護裕美，不過，矛頭直指在事件中全程潛水的黃子恆，揚言「若黃生喜歡裕美，應該出來承認」，義正詞嚴不值黃子恆的所作所為。

Jason自拍片段內容：「對連日嚟嘅報道，我想對家人同朋友講對唔住，我唔係公眾人物，事發嘅時候我唔識得處理，我唔識得PR或者語言偽術，我冇收過自己即將離婚或者搞緊離婚，我自己聽到都好愕然，我請我所謂嘅朋友，你哋唔好再放料，我聽好多人講裕美病咗或者發燒，請你哋放過佢畀啲空間佢，放過大家，拜託。我係一個男人，我會出嚟承擔，黃生，如果你鍾意裕美嘅話，麻煩出嚟承認，唔好再畀裕美一個人受千夫所指，裕美係好單純，請大家保護佢，唔好再落井下石。」

裕美	黃子恆	放大圖片

6條聲帶爆大鑊？

然而，自拍片段公開後，昨午網上即有六段疑似Jason的聲帶流出，內容與在自拍片段中Jason所營造的好男人形象相差甚遠，聲帶內疑似Jason的男人以「廢柴」、「人渣」來稱呼對方，又叫對方「唔使旨意置身事外」，語氣狂妄，語帶挑釁，當中五條聲帶的錄音對象疑似是黃子恆，例如：「你真係覺得我唔夠膽？17歲入行，前途都Bye Bye啦，玩完啦！」、「廢柴，應人一句嘅勇氣都冇。」、「爭取時間瞓個好覺啦，我畀機會你收手，你唔就，你之後呢唔使旨意置身事外。」、「起身未呀人渣！」至於另一條較長的聲帶似是對裕美朋友的錄音，男子在聲帶中自稱握有籌碼，誇口可以隨時「做冧條仔」，似乎有意爆大鑊！

疑似Jason聲帶內容：「依家我哋兩個之間嘅問題，係畀條仔乘人之危，我都唔知你哋點樣睇啦，有啲姊妹灌輸佢做自己，開心就得啦，咁即係又繼續 去搵個新啦，然之後到大家咁上下一兩年喇，好似以前咁loop囉成個人生，喂，呢個世界所有人嘅性格冇一個係相合o架，你去問吓啲專家啦，唔知你哋有咩方法令佢醒啦，依家佢……我唔知你知唔知佢嘅情緒病狀態啦，喺澳洲之後佢唔肯食藥，斷咗，佢依家got crazy o架喇，佢依家唔肯認自己有病，同佢阿媽一樣，係病入膏肓，唔認自己有病，你哋睇吓有乜辦法令佢醒啦，我啲棋係有晒，我唔行之嘛，我可以做冧條仔o架，睇吓你哋究竟搞緊乜之嘛，你哋話係佢嘅好朋友，大家你角度睇，我覺得係……就係頭先你所講嘅嘢囉！」

連日來潛水的黃子恆昨晚在經理人陪同現身電視城，一臉落寞，現場十多名記者上前訪問，但子恆多次表示要趕開工，問到近日有冇搵裕美、對於Jason拍片的看法等，他一直不想回應：「唔好意思，我真係趕住！我一陣會交代，Sorry！Sorry！」其經理人表示他會拍片向外界交代，其後記者再三追問，問他是否要一直龜縮及準備不再在圈中發展而不回應？他才被迫開腔：「我仲有嘢處理緊，所以唔回應住，當然冇可能永遠唔講，嚟緊我會一次過回應，依家真係要開工！（有冇睇到Jason段片？）知有呢件事，但冇咩睇過。（畀人影到你攬裕美腰呢？）呢啲唔回應住，遲啲一次過回應。（同裕美有冇再聯絡？）第一日之後當然有通電過，但我好多嘢做。」再問到有否跟裕美發展感情，及可知其婚姻狀況？他說：「佢講過佢同老公已經分開咗！（澄清唔係第三者？）嗰啲再講啦！只知佢哋已經分開咗。」問到是否後悔？他則不作回應，只向記者說：「唔好意思要大家等咁耐。」並耍冧鞠躬！

病咗缺席活動

至於當事人裕美昨日原定以「防毒大使」身份出席活動及獻唱，但遲遲未有現身，最後大會發言人在台上表示裕美因病缺席：「今朝同大會講佢聲沙，感冒病咗嚟唔到，同現場觀眾講唔好意思。」據知，裕美本有意在昨日活動上回應今次是非，可是未知是否受到Jason的自拍片段所影響，臨時改變初衷。另外，據知裕美昨日病情突然轉差，但她為怕見人，故未有外出看醫生，不過，她將於明天為無綫劇集《心理追兇》首度開工。昨日記者曾聯絡裕美，但截稿前一直沒有回覆。

文：名人組、影視組