美國小天后Taylor Swift月初與DJ男友Calvin Harris分手，甩拖短短兩周便撻着「邪神」湯赫度斯頓（Tom Hiddleston）！兩人被拍得在Taylor羅德島寓所附近的海灘拖手咀嘴，激到舊愛Calvin刪除所有關於Taylor的照片及留言！
Taylor本月2日與拍拖1年多的Calvin分手，有指她因不滿Calvin不願結婚生仔而提出分手，兩人分手初期關係友好，Calvin更留言指彼此再見亦是朋友，仍然有愛有尊重。不過，Taylor大前日被拍得在美國紐約羅德島寓所附近海灘，與在《雷神》（Thor）及《復仇者聯盟》（Avengers）系列中飾演「邪神洛基」的英國男星湯赫度斯頓談情，兩人手拖手行沙灘，又坐在礁石上看海，期間咀嘴兼自拍，非常浪漫，有目擊者說：「佢哋好癡纏，又攬又錫，唔理海灘上有廿幾個人。佢哋好似其他熱戀中嘅後生情侶一樣，完全唔理其他嘢！」另有知情者爆料：「Taylor依家同湯一齊，佢哋未係好認真，但Taylor成日搵湯傾偈。佢哋一齊出過幾次街，Taylor好鍾意大家一齊嘅感覺，但唔想咁快投入，想慢慢發展。」
Taylor與湯上月2日曾在大都會藝術服裝學院年度慈善晚宴（MET Gala）派對中共舞，被傳媒廣泛報道，當時湯受訪時說：「我鍾意跳舞，有邊個唔鍾意？段片畀人熱傳我都覺得好奇怪。其實我好耐冇跳，喺MET Gala跳舞係因為呢個係一個派對。我同Taylor坐同一枱，當時The Weeknd表演緊，佢話呢啲派對好多時都冇人跳舞，佢作為音樂人要為咗The Weeknd跳舞，所以我哋就起身一齊跳。」
其實當時Calvin已懷疑兩人有路，現時終於證實兩人「一舞傾情」，所以看到兩人撻着的報道後大感震怒。有感被背叛的他一口氣刪除社交網站中所有與Taylor有關的照片及留言，當中包括「分手後再見亦是朋友」的聲明。大受刺激的他在Twitter留言：「噢，有事會發生啦。」其後卻快手刪除留言，又在Snapchat上載晒腹肌配青蛙頭圖像的自拍照。
有知情者指Taylor聲稱與Calvin分手不牽涉第三者，但現時看來，她與湯早已埋下「伏線」，甩拖後火速投入新戀情，似乎不太尊重Calvin。
網友對於Taylor極速擒新仔反應熱烈，有人說：「Taylor Swift振作得快過我個微波爐，真係好快！」亦有人提議《雷神3》可以邀請Taylor唱主題曲，有網民更笑問Taylor是否想進行「食盡所有網絡男神」大行動！Taylor專門與演藝界名人拍拖，分手後便作歌唱衰對方，以「集郵」及「o趙完唱」聞名！
文：外娛組