郭奕芯自嘲鵝公喉獻Sing有驚喜
藝人郭奕芯早前為新片插曲錄音，首次獻聲的她雖然自嘲是「鵝公喉」，但唱起來卻有「小清新」的感覺，充滿驚喜！談到片中與新人鮑康兒有「SheShe」情節，她自爆曾遭同性朋友酒後強吻：「極奇怪，唔開心！」
郭奕芯（Ashina）日前在觀塘為新片《鬼網》錄製插曲，首度為電影獻聲的她起初表現緊張，但之後愈唱愈順，唱腔更有「小清新」感覺，全程零走音、零甩Beat，表現充滿驚喜！她自嘲是「鵝公喉」，坦言沒想過導演會邀請她開金口：「佢竟然話好適合，可能我唱時好傻好天真，佢仲話：『其實你都唔係唱得好難聽！』」她又表示從沒想過踩過界做歌手：「我把聲都唔好聽！」她在片中要邊彈Ukulele邊唱歌，所以最近時刻苦練，希望彈得似模似樣！
抗拒SheShe：極奇怪！
談到拍檔鮑康兒亦前來錄音室錄歌，兩人在片中有「SheShe」味濃的場面，問到會否抗拒？Ashina笑言清楚自己喜歡男性：「試過有女仔朋友飲醉後突然錫我，我覺得極奇怪，仲有唔開心。（男仔錫會好？）咁我寧願女仔錫，冇咁畀人佔便宜。」
唔介意全裸攞Feel
此外，首次挑戰鬼片的她坦言壓力大：「《同班同學》時我仲係新人，乜都唔識，依家畀人感覺係我係一個演員，所以好擔心做唔好！」提到拍《同》片有全裸戲份，是否以後都不再全裸上陣？她坦言要再考慮：「其實我唔會計較係咪露晒，演員係要配合劇情，為藝術全裸，好有藝術家Feel！」
文：影視組
攝：吳文聰
場地：Taikumi Works