曹永廉登「陸」賣樣搵食！

藝員曹永廉在劇集《純熟意外》飾演保險調查員，但今次未見以嚴肅專業形象示人，造型反而「爛撻撻」，令50歲有多的他更顯年輕，他笑說：「好彩咋！個樣睇落仲得，但副偈就唔多掂喇！」提到他與同劇拍檔吳啟華同樣經得起歲月考驗，他自爆：「我同啟華其實係小學同學，都想有機會再一齊演戲。佢份人開朗咗好多，以前比較文靜，真係會喺等埋位嗰陣拎本書嚟睇。（大家有傾吓保養秘訣？）會傾吓湊女經！」

食店執笠 另起爐灶
阿廉人緣甚廣，在圈中有不少好友，早前更與好兄弟黎耀祥、蕭正楠與陳國邦等合作《公公出宮》，贏盡口碑。雖然在短短半年內推出兩部劇集，曝光率提升，但他坦言市道一般，工作量未見增加，身為兩間食店老闆的他更計劃在年內結束生意：「生意係唔錯，但拍檔想照顧身體，冇人睇住盤生意，好難做。」

搵銀預埋好兄弟

不過，主意多多的阿廉早前已與洪天明、周家蔚與唐文龍等另起爐灶，靠不老靚樣「省靚招牌」搞美容生意，他說：「始終要養家，做生意可以為家人提供安全感。主要係大陸有拍檔做美容，近年多咗藝人合作搞生意，有得做，加上有大班朋友可以輪流睇住盤生意，可以分擔工作量。而且有明星效應撐住，起步會穩啲，不過呢個係兩面睇，始終拎咗大家個名去做，一定要好好把關。（拉埋班好兄弟入股？）佢哋都好幫手，當然想有錢齊齊搵啦！」

文：影視組

攝：唐豁莊