「女神經」祖兒陪歌迷遊埠

天后容祖兒昨日36歲生日，獲唱片公司安排推出籌備兩年的新碟《J-POP》作生日禮物！祖兒變身多款貼紙，配合以世界各地為背景的唱片封套，讓歌迷將她貼在不同的風景裏。其實祖兒一直希望在外地拍攝封套，但因工作密麻麻而未能成事，負責設計的朱祖兒為滿足她的心願而想出這個概念，難怪祖兒大讚啱心意！她說：「我細個好鍾意玩紙公仔，因為可以換好多造型，今次用公仔貼紙畀歌迷隨意貼，可以帶我穿梭城市之間。」

開心晒愛的禮物

祖兒還獲多個國際品牌提供逾百套服飾，讓她轉換形象做換衫公仔，她拍攝時「甫士王」上身，Chok出不同神情及姿勢：「同事形容我做女神，我就話真實嘅祖兒係『女神經』，同大家認識嘅好唔同，希望呢張專輯可以令大家更了解我啦！」

放大圖片	祖兒在美容廣告中盡顯女神魅力。

而祖兒昨日亦在社交網站先後上載多張慶生相，其中一張她用手機程式將自己變到大眼兼厚唇，她又引用其歌曲《一直看見天使》的歌詞：「願大家身體健康，一世做我的朋友，回頭尚發現，小天使永遠在我身邊。」另一張相就有兩盤卡通人物Miffy的鮮花盆栽，並寫道：「享受心中的安靜。」未知是否男友劉浩龍所送的生日禮物？

洪卓立等睇棟篤笑

另外，祖兒日前為美容品牌拍廣告，談及護膚心得，她透露全靠母親的愛心靚湯：「媽咪知我辛苦，平時鍾意煲愛心湯水去滋潤我。我平時都多飲水，身體有足夠水分，肌膚就會時刻飽滿。」

至於祖兒的師弟洪卓立昨日出席活動時，談及李克勤被指將加盟英皇大家庭，他笑言想看祖兒與克勤搞棟篤笑：「但唔可以夾，要爆肚，最好睇係克勤窒祖兒，好好笑！」

文：音樂組