祖藍 李亞男耍花槍：行差踏錯要跪玻璃
藝人王祖藍、李亞男和林欣彤（Mag）昨日於觀塘apm商場出席活動，恩愛現身的祖藍及亞男受訪時笑言好耐冇見對方兼大耍花槍。談到近日除了裕美傳婚變外，伍詠薇的老公練海棠也被爆「偷食」，問亞男會否睇實老公？祖藍就搶白說：「問啲咁嘅嘢？我哋成日一齊做嘢。」亞男笑言老公身邊有好多自己的「線人」：「如果佢行差踏錯，我就唔客氣，要佢跪玻璃同榴槤。（有冇跪過？）暫時冇，希望唔會有。我哋好幸福，有媒體監察佢。」談到祖藍忙於工作，是否影響造人計劃？祖藍說：「我哋啱啱搬新屋，想過多一年二人世界先。」
太太做打雜
問祖藍是否忙於北上掘金？他笑言想拓展不同業務：「開咗工作室，好多籌備工作。（投資幾錢？）唔使太多，工作室屬於邵氏旗下，仲陸續會簽近八至十個香港同內地藝人。」他坦言兩地雙線發展，也隨時準備為「娘家」無綫效力：「《老表3》我都有份籌備，綜藝節目做得幾多得幾多。（有指無綫高層余詠珊搵曾志偉再拍《獎門人》救收視，有冇搵埋你？）娘家咩時間需要我，我就咩時間返去。」
李亞男稱目前是祖藍工作室的旗下藝人，會否較有優勢？她笑稱老公工作室公平對待藝人。祖藍就爆笑「警告」太太小心說話：「你小心啲講嘢，我雪你o架！」亞男又自爆在辦公室做打雜：「我喺辦公室都要掃地同倒垃圾。」祖藍透露正為旗下藝人Mag準備參加內地歌唱比賽及綜藝節目。問Mag會否擔心壓力太大令情緒病復發？她表示狀況OK。