伍詠薇代偷食老公鞠躬道歉

伍詠薇老公練海棠昨日驚爆「偷食」大胸女，車上密會兩小時，昨致電伍姑娘，她先以短訊回覆：「同老公傾緊，要打佢籮柚，勁打佢籮柚呀！家事處理中，夫妻係要經起風浪嘅！」

之後伍姑娘如常現身中環為其主持的有線節目《伍姑娘真識食》錄影，似乎信任老公而安心工作的她，未知是否抗拒再坐老公的「戰車」，選擇坐電視台專車現身，大情大性的伍姑娘表現意外地冷靜，面帶笑容應對傳媒，問到有否被報道影響？她說：「心情有少少，睇到嘅時候，我都嚇一嚇。」

「有冇做嗰啲咩先」

步入拍攝場地後，伍姑娘被問有否向老公了解事件經過？她說：「今朝睇清楚條片，消化咗先，我發現自己幾冷靜，跟住叫醒老公，我同佢講唔緊要，不如你話番我知咩事，作為一段成熟嘅關係，唔應該係鬧完先問點解。呢個時候老婆愈冷靜處理，老公就愈驚。奈何今朝好早出門口，傾咗個零鐘，暫未清楚晒成件事，依家你問我，我只可以答做完嘢返屋企，返去閂埋門再做審判！（如屬實會否離婚？）已經問咗佢個結局，有冇做嗰啲咩先，如果有做，我就真係冇嘢講。之後點處理就唔會再同大家交代，今次係最後一次公開講。（識得片中女子？）個女仔識唔識唔重要，畢竟一隻筷子敲唔響，段片都影得佢出去食飯食得幾開心，好似初戀咁樣，抵佢畀人影到！」

伍詠薇代老公鞠躬致歉。	黯然神傷 伍詠薇代「偷食」老公面對傳媒，表現異常冷靜。	冷靜回應 「呢個時候老婆愈冷靜處理，老公就愈驚。」

「未至於講對唔住」

問到會否（目及）實老公阻女埋身，伍姑娘說：「唔會突然有攝石，另一方面諗，我唔會怪晒對方，係咪我疏忽咗家庭生活？之後解決咗問題，會抽多啲時間陪屋企人，唔係話（目及）住佢，係需要相處，我哋關係好牢固，唔係你哋講一句話就影響到，祝我好運啦，又祝福佢好運，叫佢以後乖乖地啦！」她在訪問期間數度鞠躬代夫道歉：「要大家擔心，喺度要代練海棠講一聲好抱歉，自己玩完出嚟要老婆代佢講嘢！（老公有同你道歉？）佢話唔好意思，出嚟要面對咁多記者，佢食餐飯，我就要出嚟解答，變咗佢經理人，但未至於講對唔住，如果講對唔住即係做錯事，所以呢個問題我答得好妙，希望佢唔好同我講對唔住！」

提到下月1日是二人結婚17周年紀念日，問到會否如常慶祝？伍姑娘說：「今年仲係計劃緊搞與唔搞之間，我想二人世界，加上最近工作太密，冇時間畀我約朋友，可能低調慶祝，要再諗。等我今晚返去勁審佢，但今晚都要做嘢，等呢個星期勁審佢，所以你哋應該見唔到我哋喺街，狗仔隊可以休息！」而她回應事件後繼續錄影工作，約下午六時許再乘坐電視台專車返抵貝沙灣住所，未知是否如她所說返家「勁審」老公練海棠！

文：影視組