加讚 子丹愛駒「宇宙車神」又跑第一
堪稱「宇宙最強」的甄子丹與「玩具大王」蔡志明兒子蔡加讚聯名的愛駒「宇宙車神」，昨日以大熱姿態跑出，加讚太太汪圓圓與媽咪做代表拉頭馬。圓圓大讚打麻雀頻頻自摸的母親夠「旺」，笑言日後愛駒每次出賽都要搵媽咪坐鎮！
「玩具大王」蔡志明新抱汪圓圓與母親、名媛鄺美雲（Cally）及前港姐陳庭欣等，昨日齊齊現身沙田馬場。圓圓透露代表老公蔡加讚、姊姊汪詩詩及姐夫甄子丹到場支持愛駒「宇宙車神」出戰。最終愛駒不負眾望，以大熱姿態跑第一！昨日是「宇宙車神」第二次贏頭馬，牠在最後300米加速，神速拋離其他馬匹，造出55秒66高速，並以3.6倍大熱勝出，成績彪炳。圓圓即時致電加讚報喜，並高興地拉頭馬！
開香檳慶祝
圓圓表示雖然賽事期間下雨，但愛駒反而跑得更快：「佢英文名叫Bad Boy，不過其實佢係Good Boy。（有冇落重注？）冇，因為之前試過買多咗，但係冇贏。」又笑言愛駒跑出全憑母親的旺氣：「媽咪好旺！頭先打麻雀係咁自摸，所以我拉埋佢快啲嚟（馬場）。由今次開始，每次出賽都要叫媽咪嚟！」問到如何慶祝？她表示會開馬會送贈的香檳，並與老公及子女一同慶祝。
鄺美雲「贏3萬6」
而Cally專誠入場支持愛駒「甜蜜鑽石」出賽，最終愛駒跑第四，成績不俗，身為馬主的她亦贏得約3萬6千元獎金。此外，陳庭欣透露近日忙於拍攝無綫劇集《迷》，飾演鄭嘉穎的女友，笑言被對方迷倒。問到與港男翟威廉傳緋聞的她感情生活如何？她避而不談，並自稱一直單身，專心工作。
文：名人組