謝安琪Cosplay黑寡婦 張繼聰：大吉利是！
張繼聰跟囝囝張瞻慶祝父親節前，先為囝囝慶祝9歲生日，張氏生日會以「超級英雄」為主題，張瞻變身「美國隊長」，對於太太謝安琪（Kay）竟扮演「黑寡婦」，一向型爆的阿聰也忍不住啋啋聲高呼「大吉利是」。
歌手張繼聰（阿聰）、DJ少爺占及朱薰老公、樂隊Mr.成員Dash孿生弟弟譚健榮三位人父昨日齊出席活動，阿榮更帶同三歲的兒子譚永之現身，大會安排永之玩兒童迷你賽車，少爺占因身形瘦削而成功「塞」入小跑車中，玩了四分之一圈，場面相當搞笑。
張瞻扮美國隊長
阿聰透露完成活動後要趕回家，幫太太Kay籌備兒子張瞻預祝本周四9歲的生日會，並要忙招待囝囝一班同學仔。阿聰笑言家中有如東華籌款節目，全屋逼滿人：「囝囝話請10個同學嚟，但加埋佢哋阿爸、阿媽、工人姐姐咁，啱啱太太同我講屋企有成50人，我都好想快啲返去睇吓。」
阿聰稱生日派對以超級英雄為主題，笑謂：「見到成班小朋友着住連身衫嘅樣，應該好得意，太太就買咗套『美國隊長』造型嘅衫畀阿仔，太太都有一套，佢仲問我需唔需要幫我準備一套，我話唔使喇！（咁Kay扮咩？）佢揀咗『黑寡婦』，認真大吉利是！」說到他和Kay均是藝人，招呼同學家長回家可會不方便？阿聰說：「唔會，以前都有，唔係第一次，但都會小心唔想畀阿仔覺得有無謂嘅虛榮或者自卑，畀佢知道我哋只係打份工。」
少爺占調更造人
另外，問到同場的少爺占和阿榮如何慶祝父親節？兩人都說會和家人食飯，至於朱薰剛於上月為阿榮誕下B女譚在之，問到已有一子的少爺占可會追個女？他稱現時的電台工作轉了晚間時段，令他好掛住兒子：「啲仔大女大好似森美同林海峰就做朝早節目，我啲仔細老婆嫩就做夜間，如果可以交換時段，我先考慮追多個啦！」
文：音樂組