霆鋒綁住Mani嚟炸 乜咁大仇口？
繼拍攝英皇電影《消失的子彈》後，謝霆鋒與劉青雲相隔三年「合體」，拍攝新片《驚天破》再結片緣。兩人昨日於上海出席《驚》片發布會，席上青雲搞笑叫霆鋒做「霆鋒哥」。當主持問兩人若有炸彈會炸誰時，霆鋒即搞Gag：「將經理人Mani（霍汶希）綁在炸彈上，一點就爆。」引得滿堂發笑。
青雲自爆冇偈傾
問到青雲三年後再與霆鋒鬥戲感覺怎樣？他笑說：「我哋兩個都成熟咗好多，除咗拍攝事情外，霆鋒好少講嘢，大家冇乜傾私事。」今次扮演犯罪心理學教授的青雲直言喜歡觀賞殺人片「取經」﹕「都係睇角色發揮啫！（導演有冇勞役你？）做嘅都係演員該做嘅事，導演指示好清晰，只係好多醫學上同犯罪心理嘅嘢，一開始唔係太明白。（霆鋒有冇喺現場煮嘢食露兩手？）冇！我冇試過。（叫佢請你上佢節目試菜？）你哋（記者）快啲叫佢啦！」
同場的思漩於片中飾演霆鋒及青雲上司，試過拍一場戲事前背對白足足一百次，但埋位時仍忘詞，幸好兩位影帝級拍檔很有耐性。她又打趣指平日不敢呼喝霆鋒，但戲內可以滿足一下自己，感到「很爽」！
文：影視組