龔嘉欣收入激增想買姑婆屋
藝人龔嘉欣昨日露小蠻腰到柴灣為美容院拍廣告，她說：「今年已經拍咗護膚品、麵包店同美容院廣告，收入比去年多三倍，打算12月生日前買姑婆屋畀自己。（咁灰？）冇法，人人都話姚子羚就快嫁，我要為將來打算，諗住買間5百呎畀自己，有能力再買間畀屋企人。」
提到嘉欣最近與黃宗澤（Bosco）傳緋聞，她謂：「我都唔知點解我哋劇集《幕後玩家》group chat相會流出，仲將我哋大合照裁剩我同Bosco。我強調我冇飲醉，我係飲一啖香檳就面紅。（話你稱呼Bosco媽媽做阿媽？）個個都係咁叫，Bosco都話唔叫阿媽叫咩！我同佢因劇中角色關係，先至以老公、老婆相稱，或者以後改叫龔小姐、黃生啦！（打算揪出放相者？）唔啦，自己都有責任，以後會檢點，暫時唔退group住，但會唔講嘢一排先。」