祖兒開騷 師兄匿後台捧場
天后容祖兒與馮翰銘前晚開騷，祖兒一直扮傻話未知男友劉浩龍（師兄）可有到場，最後被好友李克勤踢爆師兄秘密撐場，克勤搞笑自稱「獨家發相」！
容祖兒前晚孖音樂人馮翰銘（Alex）在會展開騷，捧場的圈中好友有李克勤夫婦、衛詩、連詩雅、陳瀅、劉佩玥及蔡思貝等，祖兒男友劉浩龍（師兄）的助手亦有出現，唯未見師兄真身。未知是否恃男友沒有「(目及)實」，祖兒在台上肆無忌憚發放千Watt電公然「調戲」Alex，穿上Bra top外笠牛仔褸的她挨住三角琴與Alex合唱，大晒平板身材，Alex事後憶起畫面自稱差點把持不住：「要即刻諗老婆！」Alex在台上話祖兒有好多變化：「好似你啲衫咁多變化，冚住又好得體……」祖兒調皮反問Alex：「你見過我除衫咩？你老婆喺度喎！」令Alex頓時口窒窒。
祖兒在後台接受訪問時，被問到男友的蹤影？她仍口硬說：「唔知佢有冇嚟睇！」不過完騷幾小時後，祖兒即被好友克勤踢爆，於凌晨時分，克勤在Facebook放出「絕密照片」及留言：「撐朋友之容祖兒獨家授權李克勤發相。」相中是祖兒偕師兄和克勤夫婦的後台合照，師兄雙手搭實女友膊頭，證明師兄一直在場支持女友，認真Sweet！
點慶生？等男友安排！
談及拍擋Alex，祖兒自爆曾以為對方是「攣」，後來才知他有家室，Alex笑說：「我老婆識我嗰時都以為我係攣，第一次見我就攬住我，原來扮基……誤會係基都幾So，最衰都係陳奐仁叫我Sis。」祖兒又表示媽咪欣賞完今次音樂性極高的音樂會後一定好開心：「我媽咪最開心，佢成日都問有冇一兩次開演唱會唔使跳舞，唔使畀人抬到風火輪咁。」
談到祖兒本月16日生日，她透露正日應該會在北京過，到時會與黃偉文及黃耀明搞個「雙子座飯敍」，至於怎樣同男友私下慶祝？她笑說：「私下嘢就私下解決啦！等安排，應該都會喺香港。」講到她日前宣布成立慈善基金，問到師兄會否幫手？她說：「細佬唔識影相都負責影相，我諗到時擔擔抬抬做苦力都要佢幫吓手。」
文：音樂組
攝：鄭家俊