陳凱琳安排「相睇」 黃心穎表錯情

無綫今年復辦《香港先生選舉》，還與《香港小姐》一齊競選，昨日大會找來岑麗香、陳凱琳（Grace）與黃心穎等靚女出席記者會，呼籲型男參選！台上一班女星分享喜歡的男士類型，Grace笑言身邊有好友合乎參選資格，並指已將其相片跟心穎分享，心穎即笑說：「乜你唔係介紹畀我咩？」Grace即笑說：「佢細過你喎！唔……我知你鍾意成熟穩重型吖嘛！」表錯情的心穎即擺出尷尬樣子，場面搞笑！

直認嚟搵番個伴

Grace透露該朋友是一名Model，問到為何在台上向心穎「派檸檬」？她笑說：「唔係！個男仔有女友！心穎咁好條件都大把啦！（年齡問題？）拍拖年紀唔係問題。」她自言揀港男着重內在美，問到外形是否要像男友鄭嘉穎般成熟？她說：「唔同嘅！咁我都未睇過呢類節目，要到時先知。」又自爆曾提議弟弟參選，但對方希望低調。

黃心穎	陳凱琳以露背打扮上陣，夠晒清新。	大會安排俊男美女呼籲型男參選。

表錯情的心穎被問到是否睇中Grace的朋友？她笑說：「個個都話我嚟搵男友咁！（真係搵？）如果啱都冇所謂嘅！（推薦朋友參加？）會呀！特別係啲同學嘅細佬，但我唔鍾意佢哋，我要成熟型！（鍾意大隻佬？）我鍾意自信得嚟唔自大，又有少少怕醜，等我發掘吓佢嘅優點。（最期待泳褲環節？）的確係好有娛樂性，但最想睇問答部分，見到佢哋答到窒窒吓！」

香香點男友參加

同場的香香則表示愛男士有肉哋但不用太大隻，能夠保護到她便可，問到會否叫圈外男友強強參選？她笑說：「都可以！等我問吓佢先。（佢符合晒參選條件？）係！佢都幾適合，睇吓有冇時間。（唔驚男友畀人睇蝕？）唔會！當係一個騷咁睇。（要着泳褲上台喎！）咁我要問吓佢先，唔可以代佢答。」

此外，監製陳旭亮與高層杜之克表示今屆港男歡迎16歲以上男士參加，年齡沒有上限，今年希望向型男方向發展，大會幫他們盡力改善造型，入選人數暫未決定，期間會透過myTV SUPER跟觀眾互動再作篩選。

文：影視組