謝賢炒車裂肋骨 麥明詩哮喘發作
年近80的謝賢前日在深圳開劇時遇上車禍，在惡劣天氣下，五車連環相撞，謝賢被撞至跌離座位，起初他以為只是皮外傷，繼續開工，怎料腰背位置愈來愈痛，最終要急送返港醫治，發現左邊肋骨裂了，需即時停工休息！除謝賢外，同劇的麥明詩也在同一日突然哮喘發作，呼吸困難，要急回港睇醫生，可謂禍不單行！
今年8月便踏入80歲的謝賢，前日到深圳為電視劇《賭城群英會》開工，怎料當他在深圳坐車期間，在暴雨之下，遇上交通意外，謝賢所乘坐之座駕，因閃避一架突然cut線的貨車而急煞車，但座駕仍撞向貨車尾，後面的車亦煞掣不及撞埋一齊，最終釀成五車連環相撞，四哥更被撞至跌離座位！
忍痛開工 乖女陪伴
不過，謝賢因不想影響拍攝進度，加上起初不覺太痛，遂堅持開工，怎料腰背愈來愈痛，最終要急送返港醫治，並發現左邊肋骨出現裂痕，需要即時停工休息！記者昨致電謝賢，他直認此事，性格樂觀的他還幽自己一默說：「我依家講嘢都痛，可能個天想警告我，叫我要小心啲，如果唔係唔畀我過八十歲啦！（仔女霆鋒、婷婷係咪好緊張？）佢哋當然緊張，兩個都有搵我，婷婷尋晚仲陪到我深夜先放心走。」
《賭》劇除了四哥外，前日麥明詩身體都出現問題，客串該劇的她突然哮喘發作，呼吸困難，也需即時回港睇醫生，麥明詩說：「我由細到大都有哮喘，遇上污濁空氣刺激到氣管就會發作，今次嘅發作都真係幾犀利，再加上我冇帶急救用嘅藥，所以要返香港睇醫生，不過依家冇事，劇組好好，好照顧我。」
王晶：最緊要人冇事
前日接二連三發生事故，監製王晶都第一時間去處理，雖然拍攝檔期有所影響，但王晶表示問題不大，最緊要大家沒事，王晶說：「拍劇總會有大大小小嘅事發生，最緊要人冇事，其他嘢我哋會安排。」至於謝賢一對仔女謝霆鋒與謝婷婷，對於四哥遇交通意外一事，則分別透過經理人霍汶希及助手回覆：「多謝關心！」
文：影視組