許愿唔信女兒係導火線
李麗珍和音樂人許愿於2000年結束四年婚姻關係，有傳兩人育有的女兒許倚榕是珍妹跟潘源良分手的導火線之一，許愿昨日接受電話訪問時代女出頭說：「唔係囉，個女係接受（潘源良）嘅，我一直都教個女要尊重長輩，尤其潘源良係咁有才華嘅人，我成日同個女講，媽咪嘅幸福最緊要。」其女現年18歲，身在加拿大，他不想傳聞影響到女兒：「我覺得呢啲傳聞唔好信，成日有人亂咁講，我就係身受其害嘅好例子。」
許愿又說跟前妻及潘源良久未見面，但彼此感情深厚：「我同珍妹會傾個女啲嘢，潘源良係舊拍檔，合作創作過唔少名曲，代表作係林憶蓮嘅《早晨》。」不過，他並不知道兩人再度分手。
珍妹舊愛雷有輝被問到潘源良、珍妹再度分手，他說：「分咗好多次喎，冇睇新聞，相信係小插曲啫。（會覺得佢哋復合？）呢啲嘢要講緣分，我同太太都係分咗手四次先一齊。」他指珍妹性格率直，相信她不會受外來因素影響。有傳潘源良早年被指有親密女伴？他認為內地傳聞不可信，呼籲外界給二人空間。而跟珍妹合作拍電影的邵仲衡，直言早幾星期在有線見過潘源良，但只談工作，少提感情事，亦不覺對方有異樣。對於好友分手，十分可惜。
