陳欽杰夫婦人棄我取創時裝王國
時裝品牌Moiselle陳欽杰與太太徐巧嬌聯手創立，憑着獨特設計、選料上乘，成功在香港佔一席位。品牌快將成立廿年，回顧過去，期間經歷幾許風雨，跨越重重難關，夫妻倆同心合力，憑着永不言敗的精神，成為市值3.92億的上市公司老闆。
陳欽杰與徐巧嬌夫妻可謂天作之合，不論家庭還是事業，均步伐一致，做得又玩得，每年公司的周年晚會，夫妻與員工打成一片，為配合主題扮嘢一番。
不做第一做唯一
陳欽杰夫婦攜手創立自己的品牌，經歷廿年風浪，成功秘訣在於永不言敗的精神。陳生說：「我哋對市場觸覺上比較靈敏，敢於嘗試，盡量去把握機會，永不言敗，唔順利嘅事堅持去做到成功為止。」他透露1997年前，他們經營出口生意，到97年覺得是時候建立自己的事業，「人棄我取」造就他們成功：「96年時發覺香港做出口呢行好難做，開始計劃做自己品牌，我同太太比較拗氣，啲人覺得難嘅就更加想做好，當時市場上覺得時裝係夕陽工業，我覺得未必係，睇你點樣去扭轉。當時又遇上金融風暴，好多人都叫我哋打定輸數，但我哋好有鬥心，人棄我取，好快霸佔咗個市場。」
經營多年，最難忘一役可算是籌備上市之際，遇上911事件，陳生說：「籌備工夫已進行得如火如荼，突然發生911，好多基金都停咗，真係一個打擊。由於上市規例，記得嗰時二月底之前一定要完成上市，我哋喺農曆年廿九得半日市，成為最後一隻成功掛牌上市。」現在經濟不景氣，又如何管理？陳生說：「唔係一定要做第一，諗吓有咩係唯一，兩者揀一樣，你就可以喺呢個空間生存。」
同枱食飯分享愛
事業家庭兩兼顧，又如何維繫家人感情呢？陳太說：「夫妻相處嘅態度好重要，屋企一直有規條，定咗逢星期六日都要同屋企人食飯，家庭關係好重要。中國人成日講同枱食飯，乜事情都可解決，透過食物分享愛，唔係只用WhatsApp講。」陳生也重視溝通，他有時也會問子女意見，始終自己的一套或許有點舊，年輕人反而有另一片視野。
五口打拚 有商有量
三名子女願意幫手打理公司，陳生陳太亦按他們的專長而分配工作，陳生說：「大仔比較做策劃多啲，好有遠見；二仔Harris就好有創意，溝通能力高，有領導能力；而三女Tiffany好有市場觸覺，做嘢好有Heart，有衝勁。」仔女幫得手，但他們卻沒有退休打算，陳太說：「每日都有好多新事物，如果退休，真係好難同世界一齊再行落去。我哋又發覺佢哋鍾意同我哋一齊打拚，同埋大家有商有量，互補不足。」
文：名人組