黎明50萬撐地下歌手：買股票都唔見！

黎明（Leon）、導演劉偉強、陳慶嘉及梁家樹等昨日出席《文化產業高峰論壇2016》，以壓軸嘉賓身份亮相的Leon大談創意產業，雖然未有接受傳媒訪問，但就於台上講不停，繼續發揮「金句王」本色。

Spiderman唔係練就得！

貴為「金句王」的他妙語如珠：「創意係自己創意出嚟，做令自己開心嘅事，每個人都有創意，要睇比重喺邊，係咪為賺錢呢？係就壓力大，好似想做Spiderman，綁住條繩喺中銀飛去ifc，練十次都永遠唔成功o架！」討論創意是否為賺錢時又說：「要有呢份Luck同好處先去行，有運同冇運，大部分人都有勇氣，但要行咗先知，唔好諗咁多錢先。」司儀鄭丹瑞見Leon講得過癮也加入搞Gag：「朝早起身嘅黎明果然句句都係金句，受益不淺！」說罷惹來笑聲連連。

爆完金句後，Leon談到幫助文化產業時一臉認真，並提議舉辦新媒體活動來吸納民間歌手：「唔需要簽合約，由Amusic拎錢出嚟做第一輪，用兩、三個月搵首好歌，擺新媒體下載，賺到錢就再放入去『小社區基金』度Run。」問到是否構思了很久？ Leon卻又轉Tone搞笑說：「唔係，突然有人叫我去記者會，好驚，唔知講乜好，記者會係講嘢唔做嘢，但我就想做嘢，咪諗啲嘢畀自己做。」更指花了一個月時間構思該建議，望三個月內能夠實行，給予民間地下歌手一個機會：「都有開過會傾，由港幣50萬開始，買股票都可以唔見啦！」

羅嘉良拍《無間道》網劇

活動上，電影公司的電視部高層梁家樹亦宣布，將與內地網站愛奇藝投資近一億元開拍《無間道》網劇，並找來羅嘉良、劉松仁及羅仲謙等演出，曾於電影版出現的曾志偉及吳廷燁則以客串身份亮相，預計本月開拍，除了於本地拍攝外，更會到深圳及泰國取景，預計拍攝4個月共36集，分別以每季12集、一共三季播出。

文：影視組