主場陳柏宇：下次唔請佢嚟！
歌手陳柏宇（Jason）和林奕匡（Phil）前晚開音樂會，吸引「睇騷王」吳業坤（坤坤）踩場，主場Jason公然同女友符曉薇咀嘴放閃，Phil更坐坤坤大髀，惜坤坤「親和力」超強，被歌迷輪住排隊「集郵」，搶盡兩主角風頭。
Jason和Phil前晚在會展開騷，圈中人吳業坤、胡鴻鈞和譚嘉儀來捧場，但坤坤人氣超勁，在場外等候入場已被Fans輪住「集郵」，到入場後情況仍未止，以為是「坤坤集郵會」，坤坤亦來者不拒隨便任影，直至開騷Fans才肯散去。
Phil落台攬坤坤
Jason和Phil演唱期間，Jason稱之前網上有個樂壇接班人投票選舉，而他和Phil是五位候選男歌手的其中兩位，這晚亦選唱其餘三位男歌手的歌。隨即Phil便唱出吳業坤的《陽光點的歌》，全場觀眾反應很大，Jason更發現坤坤在觀眾席頭排位，Phil又走落台擁抱坤坤，Jason不禁笑說：「其實有少少唔開心，全晚呢首歌係最多掌聲嘅！」
Jason咀女友放閃
到Encore時Jason和Phil唱出陳奕迅的《幸福摩天輪》，Jason更走到台下捉住女友符曉薇手來唱，最後更公然咀嘴，十分Sweet！Phil見狀便走去坐坤坤大髀，坤坤亦玩埋一份指着自己嘴唇，可惜Phil拒絕送吻。完騷後，問Jason即興咀女友？他謂：「畀個驚喜佢嘛，都問定佢坐邊，但一定唔會喺做騷時求婚。（坤坤首歌咁受歡迎你呷醋？）少少都有，但都開心嘅，但呢個後生仔……要小心，下次唔請佢嚟。」記者指坤坤是逢騷必到的「睇騷王」，Jason謂：「係咩？咁算啦，下次做騷啲海報寫埋佢名可以幫助銷情，但佢冇得分紅！」
文：音樂組
攝：鄭家俊