跟蕭正楠着古裝Deep V解暑「天真Grace」：得o架咩？
將於炎夏開工的陳凱琳（Grace），在新劇《翻生武林》中要穿着厚重古裝，相反蕭正楠戲服竟然是涼浸浸的V領。陳凱琳自爆當工作人員問她可要低胸V領戲服時，「天真Grace」竟信以為真，反問：「得o架咩？」
藝員陳凱琳（Grace）、蕭正楠、黃智賢、簡慕華、泰臣與楊詩敏等昨日在將軍澳電視城為無綫古裝武打喜劇《翻生武林》試造型，眾演員造型與不少經典武俠角色相似，泰臣與楊詩敏分別飾演「謝過」及「小龍姑」，單看造型已經夠搞笑。
蕭正楠的古裝戲服透薄兼低V，比服裝獲「厚待」、飾演錦衣衞的黃智賢與陳凱琳清涼得多，「天真Grace」笑說：「佢哋都有問我要唔要低胸裝V領，我話得(口架)咩？佢哋話梗係唔得啦！（會唔會有低胸裝微服出巡？）唔會，全劇都係咁。（鄭嘉穎好放心？）多謝，Daddy、媽咪都好放心，冇得露。（夏天拍古裝怕唔怕熱親？）心理上暫時都頂得住，到時投入角色就冇問題嘅。」陳凱琳稍後要為劇中武打場面練武，但她覺得最難是忍笑，因劇中造型嚴肅。問陳凱琳可會請教男友鄭嘉穎武打？她說：「佢依家都忙緊拍劇，我要靠自己。」
蕭正楠驚凍親
服裝最清爽的蕭正楠笑言：「夏天拍古裝，歡眾冬天先有得睇，今次好好彩，服裝薄涼啲，心口仲Deep V添！我都驚入廠會凍親，可能大家睇得多女仔『事業線』，想轉吓睇男仔啩？」黃智賢則自嘲：「你見到我已經好安慰，個心都涼咗！」皆因黃智賢的戲服同糉一樣包到冚：「為咗有型，淨係腰位已經纏咗八層，加埋帽都幾熱，自己好似端午節啲糉咁。（驚唔驚中暑？）已經買定手提風扇、冰涼毛巾、半打透汗底衫替換。蕭正楠可能心口靚，我黐鬚靚咪黐埋，都好羨慕佢。」
文：影視組