許廷鏗 陳庭欣 夾手夾腳瞓身谷劇
歌手許廷鏗、陳庭欣、湯洛雯及蔣家旻等昨日宣傳無綫外購劇《琅琊榜》，賣力谷收視的許廷鏗不惜瞓身狂做掌上壓，做到面紅耳赤亦在所不辭！以熱褲示人的陳庭欣則擘腿大玩「金雞獨立」，兩人一個用手一個用腳，成功搶鏡。
為劇集《琅琊榜》演唱主題曲的許廷鏗為了瞓身谷收視，在台上狂做掌上壓，做到面紅耳赤，至於身穿熱褲的陳庭欣，無懼走光擘腿玩「金雞獨立」搶盡風頭，場面惹笑！
拋出秘密武器
許廷鏗自言是《琅》劇的觀眾：「部劇要花心機去追睇，劇情好新鮮。」問及是否無綫派他來催谷收視？許廷鏗自爆尚有秘密武器在手：「睇套劇嘅大綱已經覺得吸引，觀眾要畀時間去睇。我唱嘅另一首插曲即將會播，希望推進到套劇。」
同場的湯洛雯提到早前生日獲好姊妹張嘉兒及朱千雪等送上蛋糕，她指當日難得聚首high tea，更大讚準媽媽嘉兒身材fit：「佢keep得非常好，佢仲問我哋佢係咪肥，但我覺得自己冇BB都肥過佢！」
湯洛雯守秘密
問到湯洛雯眼見嘉兒肚尖或肚圓？知否胎兒的性別？她承認嘉兒有提及BB性別：「我唔敢摸佢個肚呀，佢都有同姊妹提過BB係仔定女，不過係秘密，你問番佢啦。（會否做BB契媽？）冇特別要上契，但大家會好錫佢！」問湯洛雯會否恨生B？單身的她坦言有人追，但唔恨拍拖：「冇對象就跳到生B？等我第日有個男朋友BB先啦！我之後拍劇都冇時間識男仔。（有人追？）有人畀暗示，我就落閘，做朋友就好好，想留時間畀家人。」稍後她將與家人去旅行慶祝母親生日及父親節。
文：影視組