林宜芝買「鑽石」墮騙局報警

曾為「陳靜師妹」的o靚模林宜芝（Monna）一直喜歡玩手機遊戲，最近沉迷一個打怪獸遊戲，由於該遊戲玩至某個階段便要以「鑽石」升級，為加快時間「升呢」，Monna不惜大灑金錢購買「鑽石」。Monna因官方App要花700多港元才買得6,000粒鑽石而卻步，沒料到日前於遊戲內的玩家對話框中，發現一名內地網友聲稱可以600多元人民幣換取183萬粒鑽石，Monna不虞有詐即「落疊」，噩夢就此開始。

畀完又畀

Monna按照網友指示通過指定網站，透過信用卡付款，及後再以手機聊天App與對方聯絡，不過對方隨即「出招」，着她再付3,810元人民幣（約4507港元）作為開設戶口費用，而該筆費用將會全數退回，Monna謂：「我心諗都冇所謂，橫掂都成日買game，所以仲叫佢唔使退錢，點知佢就堅持要我退款，係都要我上網填銀行戶口資料嘅表格，咁我咪填囉！冇耐佢又話我銀行戶口唔啱，結果凍結咗，要我畀多一萬蚊人民幣解凍戶口，我即刻成個人醒晒，都估到係畀人呃，咪即刻問佢係咪欺詐集團，佢仲賴皮叫我報警，仲話佢公司用咗幾百萬註冊，點會呃我少少錢。」

自嘲傻女

終於醒覺的Monna徹夜難眠，於前晚到灣仔警署報案，她謂：「今次真係好傻，冇諗到會咁筍，咁咪買囉！點知中咗招都唔知，錢就事小，預咗攞唔番，但我想話畀鍾意玩手機遊戲嘅人知，唔好貪小便宜，下次唔敢啦！我係好唔服氣，有繼續玩個game，仲喺個對話框同啲網友講唔好上當，點知發現嗰個呃人嘅網友繼續出現囉！」至於在警署經過幾小時等候，並與警員透露事件來龍去脈後，Monna已大感疲倦，她謂：「最失望係警方話件事唔算喺香港發生，好難去追究，咁咪惟有當破財擋災啦！」

文：影視組