英國女星姬娜萊莉（Keira Knightley）被電影《一切從音樂再開始》（Begin Again）的愛爾蘭導演John Carney力數不是，指她缺乏演技只懂擺明星款，出入一大堆跟班，John揚言：「我唔會再同超模拍電影！」
通常導演只會大讚合作的演員，不過姬娜卻罕有地被批評！憑2007年電影《一奏傾情》（Once）成名的導演John，於2013年電影《一切從音樂再開始》請來姬娜飾演素人女歌手，片中她與Maroon 5主音Adam Levine飾演的樂隊主音男友情變後，被麥克韋化奴（Mark Raffalo）飾演的失意唱片監製發掘，一起製作唱片。
雖然電影獲好評，但John卻對姬娜相當不滿，他宣傳新片《初戀無限JAM》（Sing Street）時，在訪問中大讚麥克與Adam，卻批評姬娜唔夠班：「麥克韋化奴係個出色嘅演員，而同Adam Levine合作亦好愉快，佢其實唔會扮嘢，唔怕喺鏡頭面前揭露自己、探索自己嘅個體。我覺得演員係需要咁，當攝影機開緊時，你需要唔怕去搵到真正嘅自己。姬娜就唔係咁，佢會隱藏自己，我覺得作為演員唔可以係咁。」
John又批評姬娜經常有一大堆跟班，很難跟她溝通：「我唔係話憎荷里活排場，但我係鍾意同好奇和正統嘅演員合作，而唔係電影明星。我唔想寸姬娜，但做一個演員係好困難，係需要一種坦誠同自我分析，而我唔認為佢準備好，亦冇準備好拍戲。」他又嘲諷曾接拍多個時裝廣告的姬娜：「我唔會再同超模拍電影！」
姬娜曾獲奧斯卡與演員工會等提名，但亦曾被影評人力轟。姬娜好友班尼狄甘巴貝治（Benedict Cumberbatch）於多年前曾因一名影評人Mark Kermode批評姬娜演技生硬，即場輕輕打他手臂一下，成為花邊新聞。姬娜其後在訪問表示曾問班尼狄是否真的打人，他爆粗承認：「我梗X係有。」姬娜笑言這就是真朋友。
文：外娛組