陳潔儀手術後唔敢睇電視

陳潔儀經歷聲帶手術後，更珍惜現在的靚聲。

開騷唱新歌

手術後，Kit想盡辦法錫住把聲，休養期間甚至連電視都不敢看：「怕會睇到畫面有反應，因為嗰時唔可以發出任何聲音，要用飲管吹氣，再慢慢學發聲，好似一個跛咗嘅人重新學行路咁，所以依家每發一個音都好珍惜。（擔心影響工作？）工作已經其次，音樂對我嚟講好似已經代表咗我，心靈同精神上都係低潮。」Kit指雖然生命總會遇上低潮，但同時都會帶來意想不到的收穫，並感激家人、朋友及信仰的支持，她感恩說：「最後康復得好好，直頭睇唔到傷口，把聲比之前仲靚！」

回復靚聲後，隨着參加《我是歌手3》人氣暴升，Kit決定於下月14日假會展舉行《著迷．陳潔儀演唱會2016─香港站》，她希望將演唱會整個氛圍營造出着迷的感覺，故由選歌、編排以至燈光等都親自擔任創意總監，她稱：「感覺好緊要，希望做到觀眾覺得係我淨係為你一個人而唱！」首次在香港舉行個人演唱會，Kit表示會揀選以前沒唱過的歌曲，更特別找設計師設計歌衫配合主題，希望觀眾樂在其中。

陳潔儀擔任演唱會創意總監，務求令粉絲着迷。

陳潔儀想盡辦法錫住把聲，包括自我「靜音」。

睇好鄭欣宜

講到演唱會嘉賓，Kit笑言心目中已有人選，例如曾合作的陳奕迅和楊千嬅，不過仍要看對方檔期。問可有留意現時樂壇新人？Kit大讚鄭欣宜是後起之秀，無論唱歌及言談都跟一般歌手不一樣：「好有自己嘅感覺同風格，係一個現代女性嘅表現！」

文：音樂組