邵子風嫌貴 蝦頭閃婚不「瑞」
楊詩敏早前網晒與男友邵子風於瑞士拍攝的禮服照，惹來在當地秘婚疑雲，但兩人否認其事，「一把年紀」的邵子風笑言「我哋仲好細」，又指瑞士物價貴，搭程的士收2,400港元，難怪話要以事業為重！
藝人楊詩敏（蝦頭）早前與經理人兼男友邵子風同赴瑞士，由於未曾透露此行目的，加上蝦頭在Facebook上載紅色低胸晚裝與男友的禮服Look照片，引來網友猜測兩人到瑞士秘婚！
記者向蝦頭求證是否已成為邵太？她急忙澄清：「今次去瑞士主要係工作，因為有公司邀請我過去為晚宴做司儀同表演嘉賓。場地係一間好古典嘅酒店，所以就着得Grand啲、喜慶啲，好開心咁玩咗一晚。其實呢個Trip都算寓工作於娛樂，因為係第一次去西歐，做完工作仲去咗盧森同蘇黎世玩咗幾日。最深刻係本來想去雪山，但最終係留喺酒店遠觀，風景好優美！雖然我鍾意東南亞多啲，但有機會都會再嚟瑞士，因為仲有好多地方未去，呢個係值得再去欣賞同休息嘅地方！」
自認仲後生：事業為重
對於網友心急他與蝦頭婚事，邵子風笑言年紀仍細，又指瑞士物價高，故未有衝動在當地閃婚：「依家事業為重，唔會咁後生結婚。瑞士好靚但啲嘢好貴，最難忘搭的士由蘇黎世機場去盧森，約40分鐘車程，兌番港紙要2,400蚊！咁大個仔未搭過咁貴的士，夠我買機票來回香港、泰國，去完瑞士都係感受到香港好！因為我唔慣餐餐食西餐，香港乜都食到，而且幾夜都有得食有得玩，但瑞士景色就堅靚，過去影相睇風景確係好地方！」
文：影視組