朱滙林擲百萬 唔做律師開炒雞店
現時香港充滿「韓熱」，於《愛．回家》飾演「醒哥」的朱滙林投資百萬搞韓式炒雞店，法律系畢業的他有律師唔做反而做藝人，現時更投身飲食界做老闆。之前他更到韓國拜師，獲不少藝人幫襯。今次他找來好友莊思明試菜，並分享為做生意死慳死抵的辛酸史！
無綫藝人朱滙林（William）修讀法律系，但畢業後沒有踏上律師之路，反而做空中少爺去遊歷世界。他於2007年參與無綫的演藝新進選拔賽，成功出道做藝人。他演過不少劇集，憑處境劇《愛．回家》的李志成（醒哥）一角打響名堂。
搵藝人撐場「星」呢
William日前請來前港姐好友莊思明（Lisa）到其位於大角咀新開張的韓式炒雞店「B家（Dakgalbi） 炒雞專門店」試菜。兩人聚頭大談創業背後的辛酸！William自爆每日僅花50元過日子，「死慳死抵」10年，終於儲到約100萬元，於是冒險以畢生積蓄，與友人合資開炒雞店。他說：「同朋友每人夾100萬，我儲咗10年錢，計埋飲飲食食，每日最多使50蚊。呢筆錢未買到樓，咪博吓做生意。」
William透露曾高價競投年宵攤位賣吹氣玩具，雖然吸引很多年輕人幫襯，但利潤甚少。他說：「捱幾日通宵都賺唔到錢，最後平手走人。」得此經驗後，他決定運用藝人的人際脈絡作宣傳。他稱：「我明白喺無綫要等機會，所以空閒時間就增值自己，搵其他工作寄託。做藝人唔太穩定，不如趁有人識我或我識好多藝人朋友嘅時候去試吓搞生意，可能會有啲噱頭。」自食店開張後，《愛．回家》拍檔高海寧、朱璇、黎諾懿等經常到場飯敍，令食店變成「星」級之選，幫手催旺客源。
為了開餐廳，William更多次飛往韓國學師，誠意十足！他指店舖所用的醬料、食材、飲品等均由韓國空運抵港。為了深入了解韓食文化，William更苦心學習韓文與韓國師傅交流：「開餐廳籌備咗兩年，我就學咗兩年韓文。要真正了解當地文化，真係要靠語言。」
擬與莊思明合作
Lisa曾開設服裝店賣晚裝，結果完租約前舖位水浸，與東主不歡而散。在創業上觸礁的她直言要再接再厲，向妹妹莊思華（Mona）sell橋轉戰馬來西亞飲食界。她說：「之前賣靚衫始終唔係必需品，但食就係必須，經濟幾差人都要食嘢(口架)。所以Mona想將呢個模式搬到馬來西亞搞，因為當地只得傳統韓燒烤肉，價錢仲好貴。但呢個炒雞模式young好多，價錢又可以大眾化啲，所以有得搞。」問二人何不合作，將韓菜及馬來西亞菜來個crossover？William笑稱相信與Lisa會成為partner：「佢不嬲話OK，但想有完善計劃先。（驚大家唔夾而鬧交？）生意上總會有傾唔到嘅地方，但人夾人，我同佢應該會忍讓對方，我哋夾到嘅。」
創業Profile
開業日期：2016年2月
投資金額：200萬
（William及拍檔Billy各自投資100萬）
最新發展：研發新菜式及更新餐單
文：影視組
攝：司徒國榮