何傲兒難分真與假信咗爺孫戀？
藝人何傲兒（Lily）昨日偕樂隊Kolor主音Sammy、蔡國威及王賢誌等到學校出席分享會。穿白色貼身背心襯黑色開衩長裙的Lily透露是首次做分享會，坦言近半年受報道及緋聞洗禮，令她有所成長：「感恩有呢啲事。（最深刻係邊件事？）之前遇到新聞會好驚，好似之前嘅『爺孫戀』，嗰陣寫到連我都信以為真，明明冇做錯嘢都覺得自己做錯嘢！但感謝有呢啲報道，如果唔係唔會有咁多人識我。（同舊愛周子揚嘅風波令你最唔開心？）呢幾年打埋嚟嘅『爺孫戀』、畀人屈嘅新聞，依家見到呢啲新聞要多謝，因為有人關注自己，覺得機會嚟啦！」
訴苦減壓 檢討自己
Lily表示過往不開心不會與人傾訴，現時卻樂於分享：「以前會鬱埋喺心度，依家發覺肯同人講，先會睇番自己有咩做得唔好，手指指向人之前，要先指向自己，要問自己有咩做得唔好，所以依家有個新嘅何傲兒。」她又透露會向朋友訴苦減壓：「以前驚同朋友講完，第二日就會出新聞，不過依家搵到可以信任嘅圈外朋友，同屋企人講又驚佢哋擔心。」問到口中的「朋友」是否包括之前被拍得一起在港遊玩的台灣朋友？她笑說：「同嗰位男士係冇可能一齊。（點解？）總之永遠冇可能！」
Sammy娶到老婆最滿足
同場的Sammy則表示會分享音樂、在香港舉行演唱會及樂隊發展的經驗，問到可會講辛酸史，夾Band要捱窮？他說：「夾到依家都係捱窮，不過香港好得意，肯努力成功機會都好大，所以畀多啲信心佢哋，等佢哋唔好咁早希望幻滅。」問到入行最大得着是否娶到老婆盧巧音？他笑說：「梗係！身邊好多人都係透過音樂認識，例如隊友、音樂人、太太同太太嘅朋友，畀我返轉頭揀都係揀番呢條路！」
文：音樂組