周秀娜踩花心舊愛地底泥

與Stephy、樂基兒（Gaile）、孫佳君與何傲兒等出席開鏡儀式的周秀娜（Chrissie），獲劇組送上壽包補祝前日生日，又透露有不少朋友請食生日飯，還自爆收到追求者的禮物：「送咩就留喺心入面！暫時未有適合嘅對象。（有幾多個追求者？）唔講有幾多個啦！」談到戲中涉及多角關係，可有勾起回憶？Chrissie坦言已成過去變地底泥：「都勾唔起o架啦！已經埋葬喺泥底，依家等待緊小苗。（追求者呢？）相處吓先，多啲時間去了解，要睇吓對方有冇心思去發展。」