Stephy哭訴 唔可以話冇愛！
曾被視為金童玉女的鄧麗欣與方力申宣布「分」訊後，似乎仍未忘情，小方日前更公開承認放不低，又指曾在冷靜期中想過結婚。鄧麗欣聞言不禁落淚並直言心噏，又指兩人私下其實甚少講結婚：「公開同傳媒先有講，所以覺得呢件事有啲怪！」提到小方感慨兩人之間已沒有愛，她即反駁：「愛分好多層次，唔可以話冇愛！」
歌手鄧麗欣（Stephy）跟方力申在3月驚爆結束十年情，令不少人大嘆可惜。兩人分手後寄情工作，但小方日前在電台錄音節目公開直認難捨與Stephy的一段情，還多次夢到對方，言談間更數度哽咽。昨日，Stephy出席電影開鏡儀式時被追問此事，她也忍不住再次落淚，似乎心底裏跟小方一樣仍放不低。
聞小方放不低 心噏！
受訪時談到舊愛小方公開表示難捨這段十年情，剛由峇里返港的Stephy直言前日才在朋友口中得知，但不想多談兩人的感情事，希望先將感情丟淡一段時間，現時以工作為先，還叫大家不用太擔心兩人的感情。Stephy又自言不知可以講甚麼，說罷默不作聲，隨後突然雙眼通紅，忍不住淚水地說：「其實睇到（報道）都有啲噏噏哋，呢排都唔係咁想聯絡，因為覺得呢個時候唔識點講，表達唔到。」問到可會心軟跟小方復合，她再次停頓數秒後才表示現時沒有想這問題，並指出兩人之間最主要是溝通及Timing問題。
公開先講結婚：有啲怪！
當講到小方自爆在三個月冷靜期中，兩人曾有過結婚念頭，又覺得Stephy是好好結婚對象，Stephy說：「佢講得好啱，唔係結唔結嘅問題，都係Timing同溝通上嘅問題！其實私底下我哋好少講結婚呢樣嘢，反而係公開同傳媒口中先有講，所以我覺得呢件事有啲怪，唔想講太多。」Stephy又表示無論將來如何，都應該留給他倆去處理，至於是否如小方所講兩人之間已經沒有愛，她說：「其實都係之前講嘅問題，溝通同Timing！愛都有好多層次，好似家人嘅愛、朋友嘅愛，所以唔可以話冇愛。」
講到新戲，Stephy透露飾演女殺手，首次拍攝這類以女仔為主的動作戲：「今次我會打得型啲，仲會開槍！」提到與周秀娜及樂基兒等合作，一班女仔拍戲可會擔心多是非？她笑言習慣晒，反而很期待：「周秀娜係雙子座，同我好夾。」
文：音樂組
攝：李柏儒