阿倫酒齡當然「唔嘢小」，曾年少輕狂愛飲白蘭地，「爛飲、喪劈」搞到儀態盡失嚇到戒酒多年，直至六年前獲高人指點，紅酒是藝術品，懂得「品嘗」才是正確飲酒態度。
阿倫自爆1982年新藝城五套戲一齊搞慶功宴，當日他下午一時已經飲醉，直至夜晚慶功完才離開，但中間發生的事全部「斷片」，到翌日報紙刊登的照片絕對「嚇死人」！阿倫哈哈笑說：「我醉到變咗個Superman咁飛上枱，掃晒你哋啲行家啲杯呀、飯呀、餸呀、連張枱布一齊碌落地下，插水咁插落去，我仲着住禮服，睇番啲相嚇死我，好驚呀！」該次醉爆慶功宴後，阿倫告誡自己每年只可以放縱喪飲一、兩次：「反而落咗咁嘅承諾，慢慢就戒咗酒，直至六年前，有個收藏酒嘅朋友，教我飲酒嘅態度係去『品嘗』，唔好『劈』，自己亦慢慢培養出飲紅酒興趣。」
問到一眾好友中，曾志偉酒量是否最差？阿倫說：「志偉佢係唔識飲酒嘅，佢得酒膽，完全冇酒量，兼且係嘥！（你應該過兩招畀佢？）唔啦！佢咁大個人，有腦啦！佢次次都帶定佢架『私家車』嚟啦！嗰張輪椅呢！（志偉又唔介意畀人影醉爆樣？）佢冇啦！都爛晒嘜，哈哈！」問到可有教兒子曉風品酒？阿倫笑說：「真係唔會喎！佢都唔鍾意飲酒。（教識兒子飲酒會好啲？）驚失身呀？男仔好啲嘅……哈哈哈！（咁細個唔好飲住？）係啦！返學唔好飲住。」