伍詠薇 林敏驄車震啜到嘔
藝人伍詠薇（伍姑娘）及林敏驄（阿驄）日前首度合作拍廣告，火花不絕的二人等埋位時嫌悶扮「車震」兼「激咀」，阿驄更「咀」到伸脷作嘔！其後二人更互相過招爆金句，阿驄以「過氣紅酒」暗寸伍姑娘年紀大：「開瓶後hea咗咁多年，冇晒泡！」
日前伍詠薇及林敏驄於樂富為手機程式拍廣告，性格搞怪的他們首次合作即火花不絕，在車廂中等埋位時更即興玩「車震」，埋身借位扮「激咀」！阿驄「咀」到半路抵死地擰頭伸脷扮作嘔，而伍姑娘就露出勝利笑容，場面爆笑！
開瓶hea得耐
其後受訪時，兩人互笠高帽又狂爆金句，百厭的阿驄「先禮後兵」暗寸伍姑娘，激到對方紮紮跳兼反白眼！他搞笑地以「過氣紅酒」比喻伍姑娘，寸她年紀大：「我咁多年都未見過佢咁靚女嘅人！佢年份啱，似比較純嘅紅酒，開瓶後hea咗咁多年，冇晒泡！」提到二人在廣告中性格一急一慢，阿驄「玩食字」笑指伍姑娘身材唔夠勁：「我表現慢係因為胸有成竹先咁，佢就胸唔足，所以咪表現咁急躁。」伍姑娘聞言就反擊：「煲緊啦啲『粥』！」
「遲來的春天」
雖然被阿驄句句窒住晒，伍姑娘仍稱與他相逢恨晚：「佢直頭係我遲來的春天！好想同佢合作，欣賞佢咁搞笑同有才華！佢都係有啲黐線嘅藝人，不過我都驚佢寸我o架！」而阿驄就以粗口諧音稱讚伍姑娘：「咁靚女一定唔會寸佢，佢咁high！」祖籍台山的伍姑娘說：「佢講緊台山話，話我high，即係話我好好睇呀！」兩人又稱有意合演喜劇，阿驄說：「好呀！但佢做我阿媽又唔夠老。（演你另一半囉！）好！」
文：影視組