唐紫睿囂張格鬥王被轟勝之不武

唐紫睿及郭思琳前晚在ViuTV節目《G-1格鬥會》中進行王者爭霸戰，Hazel獲男友Louis及好友周秀娜等支持。備戰期間拉傷肌肉的思琳起初發揮不俗，頭兩回合的點數均領先，但其後因傷突然宣告退賽，終由Hazel贏得金腰帶，並獲得電影合約及三萬元冠軍獎金。

花10萬積蓄學武

不過賽果引起大批網友不滿，指Hazel因鄧穎芝（Vangie）及思琳先後退賽才贏出，有勝之不武之嫌，又轟她態度囂張，於思琳發言時周圍望及跟其他人傾偈。Hazel昨日受訪時表示已睇化評論：「我目標係做有實力嘅武打女星，以後會更堅強。做藝人閒言閒語一定有，事實勝於雄辯。（有網友懷疑賽果內定？）呢個好笑，大家都搵命博，如果內定就唔會有人參加。」她又暗寸其他參賽者經常將傷患掛在嘴邊，自己一樣周身傷，但選擇默默忍受，並自爆為上堂學武花盡十多萬元積蓄，近日要慳住食及搭港鐵。

郭思琳被網友批評戴大眼仔參賽不恰當。	鄧穎芝力撐好友唐紫睿心直口快，不覺對方囂張。	放大圖片

Vangie及劉燕妮（Rika）力撐好友Hazel，Vangie說：「其實唔好太計較邊個贏，八個女仔都付出好多。Hazel好努力，希望佢唔好因為啲留言唔開心，而且賽制本身存在問題。（Hazel態度囂張！）佢直腸直肚啫！可能贏咗太開心，急於同其他朋友分享。（點睇網友話你先係真正冠軍？）好開心我能夠保持三戰零敗，都好遺憾因傷打唔到決賽。」Rika則在網上留言表示戥Hazel心痛，並指她是為節目效果才「做衰人」，但又說：「我已經放棄咗叫你扮嘢……不過都係收斂下，你咁耐可唔可以醒少少？」不過亦有網友稱讚Hazel最懂尊重比賽又捱得，相反思琳竟戴大眼仔參賽並不恰當。

郭思琳願意道歉

此外，Hazel及思琳前晚到銅鑼灣與台前幕後出席慶功宴，早前Hazel透露與思琳比賽後再不是朋友，二人被問到「friend番未」即面有難色，思琳對Hazel說：「如果有咩令你唔舒服我願意道歉，想了解係咩事！」Hazel說：「我接受你道歉，其實練習時應該用五成力，唔係要令對方受傷！」又指以後大家見面機會不多，做朋友要講緣分。

另外，前晚節目預告運動型模媽余曉彤（Hidy）將加入挑戰賽，Hidy昨受訪時表示近日開始備戰，希望與第一季的八位選手逐一較量。

文：影視組