圈中不少藝人都有投資做生意，每人都有自己的一套，以免蝕錢收場！
李思欣：「孫耀威呢個精神真係值得表揚，蝕咗咁多仍然堅持落去，希望佢成功！做生意經常會遇到困難，好似我哋做食肆嘅，人事、食物及環境都可能有問題，真係要逐一擊破。講到蝕錢，我會因應環境同時期設一個年期，如果唔好彩平衡唔到就要斬草除根，唔會再繼續，做生意真係好講求隨機應變！」
莊思敏：「我一路以為孫耀威啲生意做得好好，其實生意成功與否都唔止藝人會經歷，只不過藝人會比較容易失敗，因為唔能夠全心全意打理盤生意。我覺得藝人做生意最緊要係搵個好拍檔，我試過遇過啲不負責任嘅拍檔，亦遇過啲穿櫃桶底嘅，好彩依家啲拍檔個個都全心全意搞好盤生意。藝人有時都幾『揸頸就命』，好多時遇到啲不公平事可能會忍氣吞聲，怕畀人唱衰，但我覺得凡事都要講道理，開心見誠。」
麥長青：「做生意真係要鍥而不捨，屢敗屢戰！我嘅心得唔算多，雖然生意方式唔同，但始終都係圍繞人，最緊要係想人所想，遇到風險時要識應變。其實做生意對於我嚟講係一種挑戰，我好怕死，預舊錢出嚟做生意都係蝕咗都影響不大先做，如果蝕咗搞到冇錢交租、冇飯開，我就唔敢博啦！」