孫耀威開舖執清光 出血蝕千萬

孫耀威多年來在中港台都「吃得開」，屬於早期到內地拍劇掘金的藝人，身家豐厚。數年前，他自資做老闆在台灣及上海開餐廳及投資酒吧生意，可惜遇人不淑，慘敗收場。久未在港露面的Eric日前為下月有份演出的音樂會接受專訪，提到近兩年猶如「退隱樂壇」，他自爆曾嘗試從商，與著名法國服裝品牌設計師Christian Audigier合作做洋酒、傢俬及時裝生意：「嗰時喺台灣同上海都有開舖，所以就少咗做幕前。」

炒人惹官非
藝人做生意大多有「血淚史」，Eric亦不例外，他說：「會畀人呃，甚至睇中你嘅藝人身份而威脅你，從中獲得好處。」原來他於2014年曾在上海開酒吧，期間解僱了一名工作態度懶散的女員工，事隔一個月後，該員工以懷孕為由，要求公司賠償40個月薪金，否則在微博「唱衰」他。Eric無奈地說：「其實解僱佢嗰刻，佢根本未懷孕，佢亦唔知自己有身孕，但內地法例係保障僱員多於僱主，後來件事鬧上法庭。」他透露當時法官曾作出調解，他亦一度打算妥協賠償，卻被同事制止，覺得不應該讓該員工得逞，在他的斡旋下，對方由原先索償40個月薪金逐漸降低要求至30個月、20個月，最終只賠償了一個月人工，他說：「個女仔又開開心心咁收咗，佢只係想呃得一蚊得一蚊！」

「相信自己眼光！」

Eric又曾於2013年在台灣開餐廳，但開業翌日即被控違規而停業，他其後再遇上呃錢員工，亦有拍檔因蝕錢而離場，遺下一堆爛攤子等他執手尾。Eric在高峰期曾聘用逾百名員工，這位「良心老闆」為了力保餘下的員工的飯碗而力撐到底，他大方承認投資蝕了八位數：「千萬以上就一定啦！某啲人令我失望，咪當上咗一課囉。（仲會繼續做？）有啲嘢冇得唔做，因為計劃咗好耐，亦相信自己眼光，有籌備啲演藝投資計劃，自己寫咗六、七個劇本，如果搵唔到人投資，到時就自己拍囉！」

提到在台灣及上海都花上千萬投資開店，最後卻關門大吉，他說：「依家有嘅實物係辦公室，會繼續做洋酒生意，香港亦有伸展出嚟嘅時裝同飾物品牌，最快有實體嘢都要等到暑假，希望好快步入收成期啦！」問到蝕了半份身家，可會重返幕前搵錢？他笑說：「的確做演藝係最快賺錢嘅，但我本身冇離開過，只係之前啲時間用咗嚟做生意，令出碟同演唱會計劃擱置咗。依家想將生意同演藝拉埋一齊做啲Project，當然希望賺到錢，唔係掟咗啲錢就冇回頭啦，咁樣好Hurt！」

文：音樂組

攝：張福宏