張秀文封胸拒做花樽

新一代咪神張秀文、劉佩玥、岑杏賢、郭嘉文、周志康及許家傑等昨日於荃灣出席無綫外購劇《琅琊榜》宣傳活動。在內地被視為「劇王」的《琅》劇，今晚起在翡翠台播出，秀文和杏賢均揚言準備投入煲劇行列。而活動上，一眾女藝人似乎想效法《琅》劇男主角胡歌的Man爆魅力，先後合力抱起周志康和許家傑，場面搞笑！

劉佩玥殉情咇真眼淚

一向性感示人的張秀文昨日穿上鬆身T-shirt，密實得令人失望。她解釋因《琅》劇是剛陽味較重的劇集，故「都係Man啲好」：「我有好多優點，唔係淨係得（性感）呢啲嘢，目標唔係想做花樽，想多啲變化！」未看過《琅》劇的她指劇集連外國人都讚好，評價甚高，她亦喜歡看鬥智鬥力的劇集，故早已準備煲劇：「我都係宅女，鍾意留喺屋企睇電視、打機。」

晒長腿的劉佩玥表示有關注網民對劇集的反應。

有靚女岑杏賢（右）和郭嘉文合力抬起，你睇周志康幾得戚！

而劉佩玥在無綫劇《殭》結局中，與飾演藍夢瑤的陳凱琳各自殉情，劉佩玥更因劇中所癡戀的關禮傑命喪而爆喊，昨日她在活動上強調拍攝時是堅喊、真眼淚：「拍嗰時冇虛情假意o架！條線都感動到我，而且有好對手關禮傑，帶到我同胡鴻鈞入戲！（演技獲讚？）有睇網民評價，亦有拍片答謝，最開心係觀眾支持。」

岑杏賢唔驚男友嬲：佢唔敢

岑杏賢日前趁男友袁偉豪沖涼時，拿着蛋糕衝入廁所唱生日歌，她笑說：「因為踏正佢生日嗰時佢沖緊涼，咁我一手拎蛋糕，一手拍片又唱生日歌！（唔怕佢嬲？）唔怕，佢唔敢！」問到兩人頻頻晒恩愛是否好事近？她說：「Sweet就開心，但『事近』就未發生，暫時冇計劃過，大家都想工作行先！」10月生日的她笑言因今次事件知道踏正生日時不應該沖涼。問到會否煲《琅》劇？她興奮表示期待播出：「聽講仲勁過《武則天》，一世人一定要睇！」至於可會與男友齊齊煲劇？她表示對方要開劇未有時間，不過不介意親自劇透。

文：影視組