區瑞強玩音樂Bingo 送特別版鑽石結他

區瑞強(Albert)一年一度的歌迷聚會《區瑞強我們一起唱大演唱會2016》將於本月26至28日假灣仔伊館舉行。Albert每年個唱都會為歌迷帶來驚喜,今年除了出動獲「健力士世界紀錄」頒發「最有價值結他」證書、價值逾1,500萬港元的鑽石結他外,他又忽發奇想大搞「音樂Bingo」挑戰「健力士世界紀錄」,他說:「歌迷每人有一張印滿歌名嘅卡,張張都唔同,佢哋要依照我喺台上唱嘅歌嚟撕歌名,成功五連橫或連直就係幸運兒,可以上台孭住我支1,500萬鑽石結他同我合照,仲可以領取我訂造嘅特別版鑽石結他走!」

Albert又表示有意申請將該環節打入「健力士世界紀錄」:「向有關方面申請緊,每場有3,500人,三場即係有過萬人參加,我想做出最多人玩『音樂Bingo』嘅創舉!」

撐黎瑞恩做「慈善歌后」

前晚他相約演唱會嘉賓黎瑞恩(小恩子)、湯寶如(湯記)練歌,唱盡多首經典金曲,好友杜麗莎亦在場,問她是否音樂會嘉賓之一?Albert說:「要保持神秘先!」

此外,早前有傳小恩子有意復出樂壇,Albert指好友熱愛唱歌,但認為她無意亦不適合再做幕前:「小恩子退出樂壇前後都唱得好好,佢同我練講養育兒女嘅國語歌《時間都去哪兒了》時太投入,爆喊要停唱。我唔贊成佢再做歌星,會提議佢做『慈善歌后』,或者做好朋友嘅音樂會嘉賓。」

文:音樂組