苑瓊丹狼死啜爆黃光亮
無綫藝人岑麗香（香香）與陳煒以「三點式」亮相宣傳活動，但敵不過前輩苑瓊丹（苑仔）出奇招搶鏡。苑仔當眾咀爆黃光亮後，再向陳山聰使出「祿山之爪」，結果搞到黃光亮向記者投訴「慘遭強暴」，場面相當爆趣！
香香、陳煒、苑仔、黃光亮及陳山聰等昨午現身商場，落力為主演劇集《火線下的江湖大佬》宣傳。陳煒、香香及樂瞳等穿上印有三點式圖案T恤現身，原本相當搶鏡，想不到「狼虎之年」的苑仔到場，即與黃光亮鬥咀，期間苑仔更豪氣謂：「我唔咀你唔姓苑！」結果在旁幾位演員「接令」將黃光亮按低在枱上，苑仔即作勢咀下去。玩遊戲時，苑仔又伺機向爆肌陳山聰「抽水」，有份玩遊戲的一位女粉絲更倣效苑仔「胸襲」山聰！
黃光亮口大似屎坑
事後黃光亮接受訪問，當被追問被苑仔「強吻」的感覺，他即答：「冇感覺，因為係佢強暴我。大家要明白強暴同做愛嘅分別，我真係未試過畀老女人強姦，不過大家都夢寐以求嘅。（開工都玩到咁？）唔係，係人都怕咗我，係得苑仔唔X怕我！」此時苑仔行近，自豪向記者表示：「相信除咗佢老婆同阿媽之外，係得我對付到佢。（咀佢有乜感覺？）佢個口好大，似屎坑吸住個口咁。（佢話妳強暴佢？）邊有女人會強姦佢呀？佢執到啦，仲幫到套劇做宣傳。（你抽山聰水，唔驚佢嬲？）唔會，我摸過佢好多次喇，一件污兩件穢，都係為工作啫。」
岑麗香未諗做媽媽
岑麗香則被記者追問有關好姐妹鍾嘉欣當媽媽的喜訊，香香笑謂：「兩個星期前喺溫哥華見到佢，佢有靚媽嘅光澤。其實之前我已經知（嘉欣有孕），不過所有嘢都係等佢自己講番啦。（搞到你想做媽咪？）未到我，我未得，不過將來一定會。」
另外，《火》劇上周收視平均24.7點，最高為28.5點，約185萬觀眾收看，而《殭》平均收視為23.8點，最高為26.7點，約173萬觀眾收看。杜如風主持的《関西攻略》10集平均收視為22點，為本年度該時段暫時最高收視紀錄。
文：影視組