陳茵媺誕7.15磅小公主

再次榮升人父的陳豪昨晨在大埔為新劇《來自喵喵星的妳》開工，完成拍攝後即趕往醫院接Aimee出院，現場有約30名記者在場守候。期間，他應記者要求3度親吻太太的額頭，受訪時聽到太太分享分娩經過時，再兩度錫太太，兩夫婦不時甜笑對望及拖手，大晒幸福！

陳豪夫婦家中已有兩名「小王子」，今次一直將BB的性別保密，至昨午Aimee終於公布：「It's a baby girl！」全場記者即發出歡呼聲，陳豪在旁笑說：「係咪賠率好好呢？」他坦言今次「追女成功」令人生變得完滿：「我有One big happy family喇，絕對係（如願）！」

Aimee與陳豪已育有兩子，今次終於追到女！

受訪後，陳豪拖實老婆離開，兩夫婦全程笑咪咪。

長腿B女Camilla勁得寵

Aimee透露B女Camilla手長腳長，似足爸爸的模特兒身形，而陳豪解釋乖女英文名的由來，他笑說：「意思係高貴、好靚，好適合佢嘅名，總之係小公主啦！」Aimee透露B女重7.15磅，今次是順產，陳豪說：「所有嘢都順其自然，BB好識揀時間，出世係吉時，所有嘢都好順利。」問到分娩經過，Aimee說：「我有喊，本來以為第3胎會好平靜，點知都緊張，聽到佢嘅喊聲我即刻好開心！（封肚？）可以開始做嘢喇！等我休息多少少會有安排，總之會返工啦！（呢份係最好嘅母親節禮物？）應該話呢3年都有好好嘅禮物。」他們指兩位哥哥已爭着與妹妹玩，可見Camilla相當「得寵」！問到打算送甚麼禮物給太太？陳豪說：「仲未送，但會送。依家有一個Queen、兩個Prince，多個Princess，仲有乜需要？」

「停工」湊B陪老婆

回家後，Aimee第一時間在微博上載與B女的合照，並留言：「Our third gift from God has finally arrived……Welcome our小公主Camilla。」另一邊廂，陳豪昨晨開工拍劇時心情靚絕，透露待《來》劇下月底煞科後，會多留時間陪伴太太及BB：「我諗會休息一頭半個月。（日後再接多啲Job？）一定要喇！（外地工作呢？）短就得，太長要睇情況。」而他接Aimee出院後即會合劇組再投入拍攝工作，認真頻撲！

文：影視組