唐紫睿壓力爆煲男友捱凍陪跑
女星唐紫睿（Hazel）早前放下性感，為拍攝真人騷走上擂台打MMA，比起拳拳到肉的堅打，女人堆裏的是非更具攻擊性，身心受盡折磨之際，慶幸遇到男友，共同經歷又苦又甜日子，她不諱言有結婚生仔的打算！
自言向來零運動的唐紫睿（Hazel），早前卻為ViuTV真人騷節目《G-1格鬥會》走上擂台與歌手龍小菌、鄧穎芝等進行MMA格鬥，Hazel說：「完成到係奇迹！冇諗過咁困難，拳拳到肉冇護甲，去到後來索性連藥膏都費事搽。我以前係零運動，只靠節食同生得高呃人，其實我細個姿勢唔正確，脊骨有啲歪，根本唔適合打MMA，但我都堅持，想大家對香港女仔改變諗法。（包括女人易惹是非呢個刻板印象？）8個女仔冇可能個個係Friend，Friend唔到咪Friend唔到囉！但有啲都好Friend，好似鄧穎芝、劉燕妮咁！」
接受挑戰
Hazel不但有美國前總統羅斯福的無畏無懼，更令人想起英國前首相邱吉爾一句說話：「我沒甚麼可給你們，除了血、辛勞、淚和汗！」在行性感與「打鑊甘」之間，Hazel說：「其實冇得我揀，就算血肉模糊，我都唔想行性感，唔會再有工作辛苦過呢個節目，我想接受挑戰，媽咪嚟睇我打睇到喊，但呢個係我工作。」
認定男友
因打擂台而壓力爆煲的她慶幸有男友相伴：「受訓期間我壓力爆煲，情緒低落要食安眠藥，慶幸最唔開心嘅時間，啱嘅人出現咗！我同男友識咗兩年，佢天寒地凍日日陪我跑步，係又苦又甜七情六慾齊晒嘅經歷，我怕咗呢個節目，但希望大家睇到Hazel嘅轉變！（認定男友係結婚對象？）雖然我之前喺情人節放閃，但都唔想戀情太高調，咁我都唔想拍散拖，我都唔細，都想結婚、生仔嘅！」
文：陳奕龍
攝：黎志輝