鍾舒祺身經百箭苦中作樂
鍾舒祺以過來人身份鼓勵年輕人勇敢「起身」追夢，主動行前一步。常被網友攻擊的她曾被笑貌似電影《哈利波特》（Harry Potter）中的「佛地魔」，她沒難過之餘，反而逐漸找到她獨有的樂趣。
歌手鍾舒祺（Sukie）收起過往搞怪的形象，向當今年輕人發放正能量，她希望透過新歌《Dreamers》勉勵他們要為夢想而行動，她說：「我想畀意識佢哋要起身，如果你有嘢想做，但唔行前一步，你嘅目標係永遠都做唔到，但你每日做少少，會發現距離會愈嚟愈近。」Sukie入行以來的路不是一帆風順，經歷過多次打擊的她亦曾想過放棄，不過很快已打消念頭：「你要人哋睇好你，你首先要睇好自己，你對一件事嘅火，係咪從一而終？初衷係咪唔變？呢啲都係一個好大嘅考驗，我都過緊。」
被寸假鼻
作為藝人容易成為大眾的討論話題，甚至攻擊對象，經常被言語攻擊的Sukie坦言剛開始會難過，但很快就從中找到樂趣：「有網站對我寫評論，個題係《鍾舒祺係咪中咗輻射？》，我好有興趣入去睇，佢話我個鼻好假，又話我似佛地魔，笑到我周圍send畀人睇，我依家係be proud of it，每個人點睇你都係一種樂趣嚟！」
堅信自己
講到她最大的弱點，並不是人身攻擊，而是被人質疑自己的能力，她說：「可能話我做唔到我想做嘅嘢，我會被打沉，意志會被消磨。」但全靠一個「信」字，令她再次從打擊中走出來：「點解你話係就係，我信自己，信自己好緊要，你係咁話自己唔得，人哋都會覺得你唔得。」Sukie在年頭的頒獎禮上得到最有前途新人獎的優異獎，絕對為她打下一支強心針，亦證明她過去的努力沒有白費，她興奮說：「原來有人認同嘅感覺係咁好，成為你再向前行嘅一個動力。」
文：音樂組
攝：吳文聰
地點：Greyhound Cafe