子珊香口膠黐假哨牙錫錫嚇窒金剛

徐子珊要戴住假哨牙在電影《刑警兄弟》中扮醜女,自創用香口膠固定假哨牙,雖然聽落核突,但有實際效果,不過搞到對手金剛無福消受!

前香港小姐冠軍徐子珊在電影《刑警兄弟》中突破靚女形象扮演哨牙醜女,素顏上陣。不過,造型最突出是一棚連金剛見到都怕的哨牙,她說:「棚哨牙專登訂造,戴住棚哨牙講嘢都幾辛苦,成日漏風,但亦係搞笑位。最辛苦係講嘢棚哨牙會飛出嚟,劇組搵咗啲假牙膠畀我黐住,但啲假牙膠有陣味,自己諗出用香口膠代替假牙膠黐住棚牙,雖然聽落有啲核突,但好過假牙膠陣味。」戲中她與金剛一對,有錫面鏡頭,但金剛卻覺得無福消受,她說:「金剛話初時知道同我做情侶以為筍嘢,點知見到我棚哨牙就話乜咁重口味呀!頂唔順喎!哈哈!」

愛情諗嚟都冇用

徐子珊最近忙於創立自家品牌網上舖,將性格容易鑽牛角尖的缺點變為設計概念,希望藉設計讓人對事物有多面看法,能改變顧客睇法為她帶來成功感。網店投資七位數,但暫時無意開實體店:「自己唔識做生意,如果開實體舖壓力會好大,網店簡單好多。」除了做老闆,她稍後會首次做導演為微電影執導。女強人徐子珊瞓身投入工作,最近與老外的也只限緋聞,感情沒有着落,談到愛情,她笑說:「自己唔係好需要,諗嚟都冇用,多諗只會鑽牛角尖。曾經有階段有諗結婚生仔,但太多朋友婚姻麻麻,令我覺得不能強求,對於自己嚟講唔係太有安全感,依家工作滿足感大過愛情。」

文:影視組 

攝:劉斌 

髮型:Maggie Law@La Biostheique 

服裝:N12 

場地:点心代表