張繼聰100分護妻封Man神
近日為撐老婆謝安琪而向網民挑機的張繼聰，因太太放假而要孭起頭家，昨日他開工時托起50磅麵粉來回拍攝仍面不改容，膊頭夠晒硬淨，難怪網民與女拍檔對他如此愛護家人紛紛讚Man，堪稱新一代「Man神」。
張繼聰的太太謝安琪展開「悠長假期」暫別樂壇，但有網友卻在張繼聰的社交網站狠批謝安琪的樣貌假來「贈興」，力撐太太的他不惜向網民「挑機」要求對話，此舉獲網民大讚Man爆。昨日，他與黃宗澤、莊思敏及鄧佩儀為無綫新劇《幕後玩家》開工，講述出監後的張繼聰在餐廳打工，托着麵粉過馬路時幾乎被已反目的好兄弟黃宗澤駕車撞倒，黃宗澤見他潦倒趁機嘲諷一番。
挑網民機：想了解點解咁無聊
太太放假休息，獨力孭起頭家的張繼聰托起50磅麵粉來回拍攝，依然面不改容，堪稱「Man神」。講到謝安琪受網友批評，阿聰說：「呢啲抨擊好多年，但今次喺我嘅社交網留言，其實唔係嬲，只係想了解吓一個成年人點解咁無聊去人哋個網頁留言講啲咁唔禮貌嘅嘢，希望呢啲風氣唔好咁犀利，唔好太過分。」對於獲網友激讚護妻，他不以為然，繼續力撐太太在《殭》的表現：「冇乜嘢呀！我同太太一齊睇《殭》，覺得佢能力範圍內已經做得好好，已經盡力去做！行內人都讚佢第一次拍劇已經好好，如果80分滿分，我會畀100分囉！（依家要孭起頭家？）佢放假我都好開心，佢都想多啲時間陪個仔，身體上亦要多啲休息，多啲時間處理屋企幾好呀！我哋又唔係好奢侈嘅人，應付到生活已經好滿足，我唔覺得辛苦。」
黃宗澤奸到出汁怕街坊鬧
同場的莊思敏與鄧佩儀異口同聲激讚阿聰護妻夠晒Man，莊思敏說：「保護屋企人當然好Man啦！」鄧佩儀則感謝阿聰拍攝時對她的提點，今次合作學到很多東西：「阿聰一向好錫屋企人，真係Man。」至於黃宗澤在劇集後期會奸到出汁，但他不介意演奸角，雖然擔心角色出街後會捱鬧，但若角色令觀眾討厭也是成功：「後期講我為咗上位，兄弟、老婆同二奶全部都出賣，算係自己最奸嘅一套劇。」
文：影視組