群星撐詞聖盧國沾「Sing」上紅館
詞壇聖手盧國沾將於7月在紅館舉行兩場作品演唱會，他感激太太過去廿多年的照顧，昨日拍攝演唱會海報時，趁機一家三口手拖手影合照。而個唱邀得薰妮、柳影虹、羅嘉良、曾路得及區瑞強等嘉賓助陣，星光熠熠。
今年68歲的著名填詞人盧國沾（沾Sir），40歲時因沖涼期間在浴缸滑倒，送院昏迷四日四夜，導致半身不遂，廿多年來需坐輪椅出入。昨日沾Sir穿上西裝，在太太及女兒陪同下為7月22及23日於紅館舉行的兩場《歌詞大師盧國沾作品演唱會》拍攝海報。沾Sir在女兒及太太陪伴下受訪，對於首度在紅館開騷，他精神奕奕地說：「好緊張！（最想邊個做嘉賓？）冇所謂，粒粒都係紅星。」
羅嘉良應承幫唱
提到當年與羅嘉良因經理人合約對簿公堂，兩人早已和好，沾Sir亦透露對方已答應做嘉賓，問到可擔心兩人成為個唱焦點？沾Sir即出言平反兩人的不和傳聞：「大家相處得幾好，咁講好唔公平同唔啱。」對於盧太自嘲是其奴隸，沾Sir望向太太說：「感謝佢一路照顧。（錫多佢兩啖？）梗係要！」沾Sir冧爆表示冇揀錯太太，盧太則自認是老一輩女人，照顧老公屬應分：「照顧佢係辛苦，唔覺得吃力，除非佢死咗。」其後一家三口手拖手合照晒溫情。
重編《前程錦繡》
而主辦單位新娛國際綜藝製作有限公司負責人丘亞葵（Vigo）大方透露，演唱會已邀得薰妮、柳影虹、羅嘉良、曾路得及區瑞強等任嘉賓。提到早已退出樂壇的關正傑曾演唱沾Sir無數作品，問到可嘗試邀他任嘉賓？Vigo說：「呢個最遺憾，邀請唔到佢，今次嘉賓大部分係原唱者。」又透露會將沾Sir填詞、羅文主唱的《前程錦繡》重新編曲，並邀請群星翻唱。
文：音樂組