黃家強企硬no show 世榮班救兵撐場
被喻為香港搖滾班霸的Beyond靈魂人物黃家駒已離開了22年，由葉世榮牽頭舉行的《家駒...愛心延續慈善演唱會2016》，將於6月10日家駒54歲冥壽假灣仔會展舉行。據知最貴的VIP門票$1280只供內部認購，其他票價則為$980、$680及$480，演唱會收益扣除成本後，將全數撥捐保良局和福幼基金會。
和事老仍抱有希望
Beyond早在2005年宣布解散，世榮由去年開始計劃這個紀念騷，並一直充當「和事老」拉攏擘面的黃家強、黃貫中（Paul），希望三子能再次合體。據主辦商負責人蕭定一透露：「葉世榮和黃貫中已確定會演唱，而黃家強則仍在商量檔期問題。」不過家強所屬經理人公司回覆：「家強當日有工作在身，唔喺香港，唔會參與演唱。家強對任何人搞紀念家駒嘅騷，都表示歡迎同多謝。」世榮透過主辦方宣傳部說：「我仍然期待家強，期待有好消息。」
雖然家強企硬拒絕合體，但世榮獲大批歌手力撐，暫定演出歌手有草蜢、樂隊太極、Mr.、G.E.M.、側田、盧巧音等。
返二樓後座搵回憶
太極主音雷有輝昨日說：「啱啱去咗二樓後座（Beyond的band房）同世榮為個騷錄咗隻歌，大家仲傾吓嗰晚想揀咩歌。我同Joey Tang（鄧建明）想揀啲冷門啲、好好聽嘅歌。頭先喺band房有番以前嗰種活力、熱血，美好片段返晒嚟。」對於Beyond三子不能合體，雷有輝覺得毋須執着，畀空間給他們自由選擇，最緊要是Beyond精神在心中：「合體只係形式，好表面嘅嘢。」
而樂隊Mr.的Bass手Dash坦言被Beyond感染夾band：「Beyond嘅歌好聽，喺舞台上更有張力，好期待參與呢個騷。（遺憾Benyond三子不合體？）Beyond係前輩，畀啲時間佢哋，況且今次個騷意義緊要過一切，係紀念家駒。」而G.E.M.屆時身在外地，表示很想參與演出，依家盡量度期。
文：音樂組