《娛樂onShow》柳妍熙愛得勇敢張惠雅傷心自殘靠家人跨過低谷

歌手張惠雅（Regen）和柳妍熙（Shay）最近推出涉及自殺、「SheShe」戀等敏感題材的新歌，但原來歌詞都反映了最真實的她們。日前兩人在《東網電視》節目《娛樂onShow》真情剖白，Regen驚爆早前曾低落自殘！

歌手張惠雅（Regen）及柳妍熙（Shay）日前在《東網電視》娛樂節目《娛樂onShow》中，齊齊向主持陳振安剖白人生的不愉快經歷及愛情觀。Regen表示去年可算是人生低谷：「上年都幾唔開心，係我人生好多嘢諗嘅階段。」

新歌大談「SheShe戀」

Regen驚爆早前曾經自殘，幸得家人出手相救：「當時我有好多唔鍾意自己嘅諗法，會傷害自己，屋企有人喺度，見我喺廁所好耐，即刻入嚟搶走我把刀。」不過目前她已走出陰霾，並將不愉快經歷投放在新曲《自己的情歌》上，歌詞更涉及自殺題材。

至於Shay的新歌《誰記得》同樣包含敏感題材——同性戀，但她強調自己不是「SheShe」：「我係鍾意男仔嘅！」她希望透過歌曲勸大家衝出界限，勇敢去愛：「其實兩個人一齊會有好多回憶，可能大家都會感覺到嗰種微妙關係，但遲遲都唔敢上前一步。無論咩愛情，都可以同對方坦承，講我愛你。」