陳詠謙失聲灰爆 想做看更

近年冒起得很快的填詞人兼歌手陳詠謙，去年壓力爆煲，有段時間變得自閉又孤僻，他自爆曾經匿埋睡房七日：「有一個禮拜我熄咗電話，呢個世代你半日唔開電話同失蹤係冇分別，我覺得自己有少少抑鬱徵狀，我一個人住都要匿喺房唔出街，覺得所有嘢都同自己無關嘅狀態，其實幾恐怖。」

陳詠謙覺得壓力爆煲的觸發點是去年年中失聲開始，導致唱片公司為他安排好多計劃都要延遲。他說：「我覺得係咪拖累咗公司？自己係咪適合做歌手？總有時候係寫唔出詞，但以往冇咁鑽牛角尖，我傳訊息畀阿媽：『阿媽我想轉行，不如做看更算。』我真係咁諗。」

最慘他連喊都喊不出，每日就攤在床上望住天花板胡思亂想：「諗人哋識我又驚，唔識我又驚，鍾意我又驚，唔鍾意我又驚，咩都驚，好多恐懼。（有冇尋死念頭？）嗰個狀態乜嘢念頭都有過，係好恐怖。」

身兼歌手及填詞人的陳詠謙，曾與周柏豪同場演出。

去年走入自閉狀態的陳詠謙，與朋友和家人都盡量保持距離。

住家男唔想拍拖

慶幸陳詠謙由細到大個性樂觀、開朗，不准自己沉溺在頹廢狀態太久：「我一路想捉番自己上嚟，但有少少力不從心，直至開始做運動，每日去挑戰自己極限，因為自閉時咩都唔做，冇辦法令到自己有自信，但運動後見到有成效好實在咁。」之後在去年大除夕，他拎張紙出來跟自己白紙黑字寫了份合約，將要做的事定下來，令自己有了方向。曾經失婚的他，感情上可有新寄望？他說：「我係幾住家男，大咗唔係想拍拖，係想搵個伴照顧對方。」

文：音樂組

攝：吳文聰

場地：鴻星酒家